ENG CHHIT MAN

India ram pum huapa Power Sector hnuaia Dan pui hman mek chu, The Electricity Act, 2003 (Act No. 36 of 2003) hi a ni a. He Dan pui hnuaiah hian kawlphetha siamchhuah chu license ngai kher lova tih theih a ni a, captive generation siam phei chu khuahkhirhna chhe te pawh a awm lo. Hydro project atan erawh chuan State sawrkar phalna lak a ngai thung; water resources hi a ṭha leh a him thei ang bera sawngbawl a ngaih avangin, Central Electricity Authority (CEA) phalna a ngai tel bawk.

He Dan puiin a phut angin state tinte’n eng chhit man (tariff) chu kum tina siam (fix) zel tura authority nei, State Electricity Commission an neih a ngai a. State Sawrkar kutah Tariff siam theihna (power) a awm tawh lo tihna a nih chu. Mizoram pawhin Manipur nena inṭawm tur Joint Electricity Commission (JERC), members pahnih awm theihna a nei ve a; State pahnihte hian member pakhat ve ve an nei a ni. Headquarters atan Aizawl ruat a nih avangin, Manipur aiawh member chu Chairman a ni hmasa ve thung a; term khat dan zelah Chairman in nih chhawk tura ruahman a ni. Hei hi India ram puma Joint Commission awm chhun a ni mek.

Dan puiin a phut, thil pawimawh tak pakhat chu state tinte’n power sector enkawl tur hian Corporation (Sawrkar Department ni lo, Company ang) an nei ngei tur a ni, tih hi a ni. Kawlphetha siamchhuah (generation), a thawnchhuah (transmi­ssion) leh a semdarh (distribution) hna te hi, ṭhen hrangin private sector te’n an enkawl phal a ni.

Orissa State hi Power Reforms lama hmahruaitu niin, Dan pui siam hma daihin State Power Corporation an nei tawh nghe nghe. Dan pui siam hnuah States dang, mainland States te chuan, Corporation an nei vek tawh a, generation hi chu Sawrkar Corporation-in a chang tlangpui ṭhin; transmission leh distribution te pawh corporation hrang hnuaia awm vek an ni. Northeast Region-ah erawh chuan, Assam leh Tripura chauhin Corporation an nei rih.

Dan puiin a tum angin, hetia company anga siam a nih chuan, fir leh fet zawkin a siamchhuah, thawnchhuah leh semdarh hna te chu an kalpui theih a ni dawn a, a chhit man erawh Regulatory Commission control-na hnuaia awm a ni thung. Sawrkar inrelbawl dan del dulzia leh discipline mumal lohzia te ngaihtuahin, Dan pui ruahmanna hi mipui consumers te’n an tangkai pui lo thei lo a ni.

JERC te nawrna vangin Mizoram P&E Depart­ment pawh hian Corpo­ration a inleh dan tur kalhmang buatsaih sak turin, Consultant atan Administrative Staff College of India (ASCI), Hyderabad te chu, kum 2005 emaw vel aṭang khan an ruai a. ASCI hian Corporation neih dan tur report fumfe tak an rawn pekna pawh a rei thawkhat tawh hle. Corporation-a inleh chiah hma pawh hian, a bul ṭan nan Departmental Restructuring te pawh, ASCI thurawn angin an siam daih tawh. Mahse an mutan ber chu, P&E Department hnuaia hnathawkho Associations hrang hrangte objections siama ṭan an khawh tlat vang ni berin a lang.

Tichuan, Corporation siam hlawkna ilo te zir chiang turin JERC chuan, hman kum lawk khan Tripura-ah an Chief Engineer an zuk tir tawh a. A report kimchang Corporation neih a ṭhat zawkzia recommendation pawh a awm dim diam tawh an ti. Corporation chu neih veleh a thil fel duak nghal tur tihna ni lovin, kum ¾ vel hnua, a nih dan tur anga thil a kal fel hnuah, ihe lovin consumers te’n a hlawkna kan chhawr ngei dawn a ni. Kum 2020 emaw lai khan Cabinet hmaah a chunga kan sawi report ilo te hi pharh a ni tawh a, mahse thu tawp siam a la ni lo.

Dan puiin a phut angin JERC hian Department te’n kum tina an Aggregate Revenue Receipt (ARR) an thehluh ṭhin chu, uluk takin an lo zir chiang ṭhin a ni. ARR-in a ken tel te chu, establishment cost (thawktu hlawh etc.) te, lirthei POL te, MR ilo leh a kaihhnawih hrang hrang etc. Department kalphunga bet tlat, tihtlem tak a ruanga kum tina pung ṭhin te leh adt a ni. Hengte avang hian kum tin ARR chu khel lovin a pung zel ringawt. Hei hian a nghawng chu tariff tihsan zel a ni mai awm e.

JERC hian Department hotute an sawipui hnuah, Public Hearing a siam ṭhin a. Nikum khan hun tiam chhungin mimal uihum emaw lek leh pawl (organization) pahnih/ khat bakin sawiselna an siam lo a ni awm e. Final Notification chhuah hnu leh engmah sawi theih tawh loh hnuah, mipui kan phun leh sup sup lawi a; enga khaw lawi lova Sawrkar va mawhpuh ta chiam chiam ṭhin lah bo lo.

Tunah pawh tariff tihsan phutin Department chuan JERC hnenah a zualko leh tawh a; mipui objection siam theihna hun pawh tun February ni 20, 2022 thlenga siam a ni. A sawi theih hun lai hian, consumers’ union te leh tute pawhin bengvar ila; tawngpawng hnial kalh ngawt lovin, awmze nei takin, a khun a khan taka sawi tur nei chuan sawi a hun leh ta e.

- Rin Sanga