Kuhva smuggling kan sawi a, Politics kan sawi lo

Tunlaia social media lama kuhva tawlh ruk smuggling lian tak sawi apiang hian politics kan sawi emaw tia lo hnial kalh tum ṭalh politician an awm ziah a. Kuhva smuggling sawia ruling party kan bei èmaw ti tlat an awm bawk.

Ruling party mem­ber ṭhenkhat lahin an party kan bei emaw an lo ti tlat bawk a, kuhva smuggler ten kan ram an tihchhiat tawh avangin kan sawi chhuak zawk a ni.

Kuhva smuggling hi Myanmar aṭanga nihawichi, elec­tronics item etc nen sawi pawlh ṭalh an tum hi chuan politics kan sawi anga an ngaih vang a ni.

Kuhva tawlh hi chu a volume a tam avangin a sum hrawm pawh a nâ, chu pawisa awlsam taka hmuh dan chu dan hnuaiah ni se chu kan inchuh tur a ni ngai a. Mahse dan lova thil tih sum hmuhna ni si hian dan hnuaia hnathawkte hmalam hun a khawih pawi em avangin kan vei a, kan sawi a ni. Tumahin party inbeihna emaw lo ti tawh ngai suh u.

Kuhva smuggler liante hian Aizawlah thleng thleng in hmun an lei pawp pawp a, chu chuan in hmun man a tito teh asin.

A square feet hian chhut ila Aizawl aia in hmun to na hi a tam vak lo a ni. Sorkar hnathawkte hi kan thik ṭhin a, mahse UDC vela pension tán chuan pension hnua inhmun lei a, in sak leh dâwn chuan huphurhawm tak a ni tawh.

Aizawla in sakna tlak in hmun pang­ngai deuh hi chu nuai tam tak man a ni fur tawh a, tute emaw pawisa neiin an lei pawp pawp (chiahpuam, khehpuam telin) aṭang khan in hmun man hi a to em em a ni.

In hmun hi chu entirna pakhat lek a ni. Heti hian pawisa thianghlim lo hlawm lian (black money) vir vel hian Mizoram ei leh bar zawnna a nghawng a, a tawpa tuar bertu chu mi rethei zel an ni.

Mi kuhva tawlh mai mai lo vei, tia sawi sawi ho chuan economy chet vêl dan an man lo tihna a ni a. Khawi hmunah emaw dan lova thil hlawk bik a awm hian hmun danga sum vir vel a khawah buai dan hre turin an inchhiar zau ve a ngai.

Taxation Depart­ment lamin GST an lo pek dan hi chu an sawifiahna ka chhiar pawh khan a fiah lovin lâk hram dan an zawng ngar ngar a ni ber a, a origin hriat loh thil a ni miau si a.

- Lalremruata