Pathian nihna: Habakuka bu aṭanga thlirna

Habakuka buah hian Zawlnei Habakuka leh Pathian inbiakna kan hmu a. Zawlnei Habakuka hi Pathianin khawvela ro a rel danah a vui a, a chhuahchhal bawk a ni. 

Israel ram lehkhabu­ahte hian heti anga mihringin Pathian a chhuahchhalhna hi a hmain a la awm ngai lo hial ang tih a ni. Chuti anga Pathian chhuah­chhalhna leh A rorel dana vui Habakuka hnena Pathian nihna ropui tak tarlan a nih dan hi i lo zir teh ang.

A bu hming: Hebrai Bible-ah chuan ‘Habaqquq’ tia ziah a ni, a awmzia chu ‘pawm’ tihna a ni. Greek ṭawng Bible Septuagint-ah chuan ‘Ambakoum’ tiin an ziak. Latin Bible Vulgate-ah chuan ‘Habacuc’ tia ziakin Sap ṭawng Bible-ah chuan ‘Habakkuk’ tih a ni; chu chu Mizo Bible-ah ‘k’ pakhat paihin ‘Habakuka’ tiin kan sawi ve ta a ni. 

Tu ziah nge?: Habakuka ziaktu leh a ziah hun lai hi German Theologian, Karl Ferdinand Reinhard Budde chuan, kum BC 615 vela ziah a nih a ring a, a ziaktu pawh Zawlnei Habakuka ngei hi niin a ring. 

Mi thiam ṭhenkhat erawh chuan Habakuka 1:6 a Kaldai ho tih hi a tirah chuan Kittim, Grik ho sawina a ni e, an ti a. Chuvang chuan chuan Habakuka bu hi Grik lal ropui Alexander-a lal lai kum BC 333 velah an ziak a ni, an ti ve thung. 

Mahse mi thiam tam zawkte chuan kum BC 600,  Babu­lon-in Kermis-a hneh­na an chan leh Nebukadnezzar-a’n Juda ram a run a, Jerusalem a lak inkar vela ziah a nih an ring.