Police indaih lo hi pawm a harsa a ni

Covid-19 do turin kan civil mite ramri lamah an han thawk chhuak suau suau mai a, mahni veng leh khua ṭheuh te venghim turin tlawmngaiin mi tlaivar ṭhak ṭhaka an feh chhuah laia thil an sawi rik ngun tak chu, "Police an indaih lova," tih hi a ni. 

Police indaih loh thu kan hriat hi titi hrang hrang han dawn khawm leh mimal thil tawn ve aṭanga thlir pawhin awih a harsa tih hi sawi lan ve a ṭulna a awm a ni tun dinhmun kan tawn mekah hian. 

Covid-19 boruak a rawn rik hluai khan Local Level Task Force tih leh Village Level Task Force kha an lar em em tih kan la hre awm e. Mizote chuan, khatia mi tlawmngai duty an han lar khan mi ṭhenkhat chuan, "Khawnge hlawh nei zawk Police an awm?" tiin an hau ti vel ṭhin a, mahse Police lamin an hnathawh dan an rawn sawi ve kha chuan an thawk nasa hle tih kan hmu thei a, mahse Police indaih lohna hi chu an la sawi zel a ni. 

April ni 20 Vanglaini chan­chinbu report kan en chuan, Mizoram Inspector General of Police  hova police officer-te'n Covid-19 donaa police hmalakna a review meeting vawi 4-na an neihah chuan IGP chuan, Mizorama khawchhak leh khawthlang lama ramri hrûl hmun 135-ah police 700 velin venhimna hna an thawk mek tih a sawi a. Task Force-te hi hmun 198-ah mi 2,000 aia tlem lo ni tin an duty bawk a, police-te leh mi tlawmngai rual inpete nen thawhhona ṭha tak kan nei a ni, a ti a ni. 

Police pawh an duty nasain Task Force pawh an duty taima tih kan hria a, heti chung hian kan duh ang Police chu awm thei se Task Force hi duty a ngai lo tur. Kan thupuiah han lut dawn ta ila, Police indaih lo an sawi lai hian Lock Down lai pawhin Police Officer ṭhenkhat chuan an in sak an chawl lova, Police tam tak an chhawr char char thei tho a nih chu mawle! 

Police motor hmanga Lock Down laia in sa tur phur khawm hial pawh an awm tih an sawi a nih chu. Police officer hian dan ang thlapin ardali (spelling a dik lo maithei) an chhawr thei a, mahse a zat bituk a awm a, tunah hian bituk awm lovin Police Officer ṭhenkhat hian a 10 bite hialin an chhawr reng a ni, Lock Down lai pawhin hetiang hi a ni tho a nih chu! 

Hei hi chhui chian ngai zawk chu a ni Police indaih lo kan sawi dawn chuan.