Mipui thlàvang hauh ngam lo MLA
Ziaktu thiam tak takin an ziah chhuah tawh, India huap pawha mi thiam tehnaa lang phak IAS pachal Pu Haukhum Hauzel meuhin a rawn tui hnih tawh hnua keini ang ak zat hnih hnuai lam rawng lo lehnghalin kan rawn la belhchhah hram hi chuan kan vei vangah min lo ngaih sak mai ula.
Thu ziah thiamna leh khawvel thiamna lama kan u mai ni lo kan pute ziah tawh kan rawn pui ve dâwn mai mai a ni, khawi lama thil thar mah ziah tur kan hre lo ve.
Lunglei khawpuiin RTPCR khawl a mamawh em em a. Khawl ringawt ni lovin laboratory a mamawh tel a, chu chu Lungleia zin pawh la zin lo Aizawl aṭang pawhin kan lo hre ve phak a ni.
Mizoram population thlirin chhim lam zawngin an hman ṭawm theih RTPCR khawl mamawh a nih laia, "Kan mamawh lo," tih tluka MNF nih vanga engmah sawi ngam lo Lunglei MLA te kha ka dem a ni. RTPCR khawl Congress pa-in a pek chhan kha a lo hrisel lovin politics taka tihbuai a tum vang a lo nih tak tak phei chuan, ṭangkai takin lo hmang nghal mai ula Lunglei MLA te kha in hmingṭha a ni dâwn asin. Lunglei tana ṭha turah chuan pawl dang pawh thawhpui thiam in ni mai tur a ni.
Hun ṭha in bawh pelh zo ta a, Lunglei MLA neihte chuan Lunglei mipui hriselna, an thih leh dam lam aiin Political Party an dah pawimawh tawh a, mipui an phatsan a ni.
Heng MLA zingah hian bial dang daih veia Pu Lalduhoma hektu pawh an awm nual mai. Mahni voter te tana RTPCR pawh sawi ngam lovin Serchhip voter thlan tlin sa paih turin in han hek vel a, Lunglei MLA te hi in mak kan ti a, Mizo pa takin in awm ngam lo a ni. Mimala ṭha tak tak ni si, party hlauh vanga in ngawi reng kha in voter, 2023 maia an khawngaihna in dil turte hian chiang takin an hmù asin. Hun ṭha a liam ta.
Champhai lam chu Zokhawpui inti ngat an ni bawk a, Lunglei tih sualah an lo inzir fing ang chu tih lai mekin Kuhva smuggling chungchangah 'ṭik' pawh an ti ngam ta der lo. Champhai mipui an buai nuai nuai laiin party hlauh vang bawkin midum zinga.... an sawi ang maiin ṭhu ngawi kur mai. Champhai mipuite vote hi 2023 ah hian an la dil leh duh a nih chuan, hun harsaa ngawih chuh chi hi an thlang nawn duh lo a nih pawhin tumah thiam loh in chantir thei lo vang.
MLA hi mipuite thlan tlin, mipuite tana ding tur an ni a, party tana dinga mipui phatsan mai tur a ni lo ve.
- Lalramsanga