AIZAWL-AH ZIRNA IN HAWN A LA HUN LO

- Lalnunmawia

February ni 7 zan dar 7 ZONET Chanchintharah khan Mizorama zirtirtu pawl ṭhenkhat hruaitute thu leh hla puan a ni a, online class-in zirna quality a tihchhiat nasat thu leh zirna in hawn hun an nghah­hlelh thu te a ni.

Tunhnai-ah Vanglaini chanchinbu-ah ngei pawh zirna in hawn a ṭul tawhzia chhiar tur a awm chho zui ta bawk. An thlirna tlang aṭang chuan a awm takzet. Amaherawhchu, tunhnai­ah Covid-19 3rd wave (Omicron) in Mizoram pawh thingtlang kilkhawr ber thlengin min nuai leh mek a ni a. Tin, a hma a hri la kai ngai lo pawhin kan kai nasa ta viau bawk.

Nausen aṭanga pitar/ putar thlengin thihpui an la awm zeuh zeuh reng a, positivity rate pawh a la sang viau bawk a ni. Chu mai ni lovin, WHO chuan Covid hri thar rawn awm leh mai tur anga sawiin a hma zawng aia inkaichhawn awlsam zawk ni turin a puang lawk mek bawk. Hetiang boruak rit tak karah hian kan tu leh fa, a bikin Nursery, KG, etc. zirlaite hi rilru dam takin sikul kan kai tir ngam dawn em ni?

Nikum pawh khan kum bul lamah rei vak lo kha Zirna In hawn a ni a, hrileng a hluar tak zel avangin khar leh nghal a nih kha. Kha ta ṭang khan eng nge zir tur kan neih: Zirna In hawn a nih avang khan thingtlang hmun hrang hrang aṭangin Aizawl kan pan khawm leh a, rei lovah Zirna In khar a nih leh tak mai avangin zirlai tam tak Aizawlah an tangkhang nual a nih kha.

College leh University-ah phei chuan State pawn lam mi zirlai an awm ve tak zel avangin an dinhmun pawh kan ngaihtuah tel ve a ngai awm e. Tun hnaia MZU Controller of Examination-in tun semester kal lai mek hi offline a exam buatsaih ngei an tum thu a sawi te kha ngaihtuah ṭhat atan a ṭha hle mai. Online a class kal char char a, exam dawna Aizawl leh College dang awmna District capital a inchah khawm leh vak si khan zirlai harsa tak takte harsatna a siam belh mai mai dawn niin a lang.

Zirna quality chung chang pawh hi sawi thui viau ngai lovin a tlahniam dawn tih hi chu mitin hriat sa a ni. Online class lo hi chu duhthlan tur dang kan nei rihlo a ni mai em?

A negative impact hi tam hle mahse zirlai tam tak chuan online class avang hian In lamah hun an neih tam phah a, an zirlai piah lamah thil dang tam tak an zir tel theih phah ve bawk a ni. Chuvangin a pawi­mawh ber chu nu leh pa leh zirlaite kan ni.

Tun hnaiah Aizawl khaw­pui veng hrang hrangte Red Zone-ah puan thar leh a ni a. Chu chuan mi tam tak eizawnna a nghawng leh mek a ni. Sumdawng pawl lian MIMA pawhin Sawrkar hotute dawr kualin nitin a hnathawh theih an duh tawh takzet thu an aupui nasa a nih hi.

Ei leh bar zawnna (eco­no­my activities) hi tluang takin kal thei se la, a bak mipui punkhawmna lam chi hi chu la inkhuah­khirh a ṭul hle in a lang. Nikum­ah lockdown rei zet kan tuar tawh a, mi tam tak eizawnna in a tuar hle bawk a nih kha. Inkhuahkhirhna thlahdul avang hian kha­tiang lockdown kha kan hma­chhawn leh thei reng a ni tih hriain zirna In hawn leh mipui punkhawm tam theihna lam chi thlahdul hi chu i hmanhmawh lo ang u.

Sawrkar pawh nikuma kan tawnhriat aṭanga in zir zel chung a ruahmanna a siam thiam beisei phawt ang. Chuvangin, a chunga kan sawi hrang hrangte avang khian thing­tlang lamah Zirna In hawn theih a nih pawhin Aizawl khawpui bikah chuan a la hun lo takzet niin ka hria.