PATHIAN HMEL KAN HMU

- C. Lalduhawma

Chheiraw! Ka fanuin a kai ve ta. Hripui thawh thumna a lo thlen meuh chuan kan inveng seng ta bik lo e. Chhungkuaa inkhung ṭhap a ngai leh ta. Mizorama kan neih hmasak ber rawn chuanna thlawhnaa kan fapa a chuan ve avang khan a tirah ni 28 chhung kan inkhung bik tawh. Tun ṭumah hian kan fimkhur loh thar tak kan hre hran lo a, zalen hulha kan pharvar thar viau lah kan hre hek lo. Hri a leng miau a, mihring leh mihringa inkai darh theih a nih tlat avangin eng emaw zeuhah kan kai a ni ve mai. Hri inkai darh theihna hi a tam lutuk a, a risk sang zualte chu sawrkar hian a phal lo ṭhin a lo ni a, phunchiar lutuk tur a ni lo e, kan damna tur a ni e tih hi pawm ve mai chi a ni.

Ka fanu-ah a tawp lo a, ka nupui leh ka fapa pakhatin an kai ve leh. A rei chia kan inkhung a ngai ta. Chhungkuaa awm nuam ti chi, inngaina chi kan ni hlauh zawk a, hrehawm kan ti lutuk lo naa inkhung boruak hian min phuar rit duh hle. Zing thawh hlim aṭangin kan hman nghal a, ni kan hman dan erawh chu a zalen halh mai, sana a ṭangkai lo. Kan LTF te hi hun ṭha lo atana Pathian ruat an ni emaw tih mai tur an ni.

An taimain an han fel em em khawp a, Positive chenpuite tan group hran an siam a, harsatna kan neih leh neih loh min vil reng a, kan in-test theih hun tur, a darkar nen lam min hrilh zat zat a, zan rei leh zingkar hma lutuk an nei lo a ni tawp. Phone thlengin min umzui thei a nih chu! A positive-ho pawh group hran an siam a, doctor rualte nen vilin damdawi ei tur nen an hrilh a, ni tin maiin an khawsik leh sik loh, boruak an hmuh ṭhat leh ṭhat loh thlengin an vil peih nia! A hunah chuan ‘in zalen’ an rawn ti leh mai a ni. Kan hahdam teh e. Pathian min enkawlna hi a ang ber mai. Anniah hian Pathian hmel kan hmu a ni.

Pathian hmel dang kan hmu leh ta zut zut mai. Kan kawngka bula hmeh rik a rawn rik a, kan va chhuah chuan kawngka bulah ei tur a lo awm ringawt zel mai a ni. Chutiang chuan mi hrang hrangin an rawn ti an rawn ti ta mai a nih chu. A ṭhen chu an mawng phê te kan hmu hman a, hmuh hman lohte pawh an awm. Kan dawng satliah a ni lo, ‘a maka maka tam’ kan dawng a ni, kan uar lo. A mak hi kan ti tawp thei lo a, patling lung a chhe thei a ni.

Kan zak ngawih ngawih a, keini chhungkua mite ṭanpui kawnga thawh nep em em mai, khawtlang leh pawl thilah pawh a kut zum pawl kan nih vei nen. Mite hi kan va'n tluk lo em! Hripui len tirh aṭang khan mite ṭanpuina thawm ngaihnawm tak tak hriat tur a tam hle a, ‘an va’n tiṭha em,’ ‘an ti ropui mang e’ kan ti liam mai a, han tih ve chhe tê chu nei mah ila a tak takah chuan kan kut a zum leh ṭhin. Kohhran leh pawl anga ṭanpuina rel ṭumah erawh chuan ka phur thei hle a, a tam lama pek zel thlawp zinga mi ka ni. Ka khêl thêp belh tlat hek lo le. Ringtu ṭha ni em em lem pawha kan hriat loh, ṭhian pawlho anga an ipte ngei thêp zawnga pawisa thawhkhawma luang chhuak ṭhinte kha ka ngaisang thar hle.

A hminga Kohhran upa ni ve ta chu, inkhawm thei loa kan awm hi hrehawm kan ti ve hle a, sawrkarin rem an tih lohte hian kan lungawi lo lek lek ṭhin. Muang leia kan inkhawm lai khan hmangaihna thu te, ṭhenawm khawvengte inngeih thu te, kristian nun dan turte kan sawi kur ve luai ṭhin kha a ni a. Kan thusawi a ṭha ti pawl an lo ‘amen’ ve a, ‘amen’ pawh hlawh lo kha a tam zawk kan ni lehnghal. Inkhawm bana min chibai a, “I sawi ṭha hle mai,” tih kan hlawh khan kan lung a awi tawk ve em em chu a nih kha. Mahse chu chu a tawpna ni maiin a lang. A sawitu ngei pawhin ka hmang zui lo a, a ngaithlatu lahin an nunpui lah kan hre hek lo. Kan social media lam kan en chuan kan ram chu hlemhletna tamna ram, aids hluar berna ram, cancer tam berna ram ni mai awmtein kan lang zawk si. Biak inah a ni emaw kan nunhonaah emaw Pathian hmel hmuh tur a va vang em! Kan inkhawm leh thu ṭha kan sawi tluk tlukte kha a thlawn ta em ni tih hi ka ngaihtuah thar nasa ta hle mai.

Amosa hunlaia mi dang ngaihsak kawnga an tlakhniam nasat leh mi retheite chanai an chhuhsak nasat lai khan ‘I ṭingṭang rimawi chu ka ngaithla lo vang; chuvangin ka lakah i hla bengchheng chu lo bo rawh,’ a ti kha a ni a. Kan chhungkua chuan hei hi kan hre chhuak ta. Mi dangte kan ngaihsak thar theihna turin covid hmangin kan hla bengchheng chu Pathianin min laksak rih a nih hi tih hi. Mi berh leh harsa ve te te, amah Pu HL-a tih dan takah 'a hlawh tam dan indawta ding tur ni ta ila, sâwtah lang pha lo tur ni mai awm, hna nghet pawh nei mumal loten' asin thilpek min rawn pe ni! Kan inkhawm ṭhinte, hmangaihna thu kan sawi ṭhinte kha a thlawn lo e, mite rilruah a lo la cham reng a, Pathian hmel kan hmuhna hmanrua an lo ni ta. Kei, a sawi ṭhintu thinglungah hian a la thawk hleithei lo zawk a nih hi maw!

He hripui hi a ngeiawm a, a chimawm a, a ninawm a, a huatthlala viau na a, Pathian hmel kan hmuh phahna a nih avangin a va hlu si em! Pathianin zah ngai se la, kan inkhawm pawh phal leh hram teh se. Chutih hunah chuan Pathian hmel rawn lantirtute kha chuan hla ngaihnawm an sa thei tawh ngei awm si a, kei ve hi ‘I hla bengchheng kha la bo rawh,’ min la tifan mai ang em?