Sikul kal A hlauhawm em?
Tun hnaiah Covid avanga sikul naupang sikul chawl rei tawh lutuk ngaimawhna a lo lang ṭan a. Rawttu tam zawkte rawt angin kei pawh hi sikul kal ṭan tawh thlawptu zinga mi ka ni e. Sikul kal ka duh tawh chhan point tawi te te panga ka rawn ziak lang ve teh ang:
1. Sikul naupang kan tih te kha kum hnih chu in naupang an ni ta a, inah an tawm rei tawh hle a ni. High school rap miah lovin an pass a, Higher Secondary pawh kal lovin college an direct pawp pawp mai dâwn si a ni. Hei hian an nunah thil kim lo a siam sak dâwn a ni.
2. Online hi ṭha viau angin a lang a, a ṭha lo tih chu kan pass percentage aṭangin a lang reng a, exam zawng zawng deuhthaw an pass a, hei hi in lama kan inzir chungin a ni zui a. A chhan awm thei chu exam zawhna a awl hle a ni thei a, exam chhan danah fair lo a awm a ni thei a, chu bakah an zir tlem avangin exam tur pawh a tlem a ni thei.
3. Online class kal ve thei lo thingtlang leh khawpuiah pawh zirlai eng emaw zat an awm a, computer leh phone neih loh vang, internet neih loh vang leh in aṭanga signal man lo pawh an awm a ni.
4. Zirna quality an hloh nasa a, hei hi dam chhungin recover tur pawhin an beih nasat a ngai viau tawh dawn a, sikul kal ngei hi a ṭha a ni.
5. Ka point pawimawh ber chu hei hi a ni a, hri a zawh huna sikul kal kan tum chuan kan tlai zo dâwn. Kan nih nih nih ngam a hun tawh a ni.
Tuna SOP-in a khap hma khan kan inkhel leh luih luih tawh a, bazar ah kan pung khawm hut hut bawk a, kan zirlaite an lêng suau suau chungin sikul zawk kan khar tlat thung.
Kan chhungkua aṭanga pawn chhuak an awm reng chhung chu ina fimkhur vanga kan khung zirlaite hi hri lakah an him chuang lo a, chhuak lo tawpa inkhung vek theih si loh chuan sikul leh college hi kal law law mai tur a ni.
- Lalfakawma