COVID-19 do nana MLA-te pawisa thawh politicise hi

Congress MLA-ten May thla hlawh an lak tur Covid-19 dona atan CM hnenah advance-in an pe a, an thla khat hlawh aṭanga Basic Pay 100% an pe, chu chu Rs. 80,000/- a ni. "Boruak azirin kan pe zel ang," an ti bawk a, hripui leng a kian mai loh chuan an pe zel ang a, thla 3 chhung an basic pay 100% an pek char char phei chuan MLA pakhatin Rs. 2,40,000/- vel an thawh hman daih dawn tihna a ni. Hetianga vawi khata hun rei tak atana thawh huk lo a, a ṭul dan ang zela thawh hi sorkar hnathawk tam zawk duh dan pawh niin a lang.

Chutiang bawkin MNF, BJP leh Independent MLA dangte pawhin phal takin thla 8 chhung an basic pay aṭanga 30% an pe dawn a, thla tina an pek tur hi Rs. 24,000/- a ni a, thla 8 chhungin Rs. 1,92,000/- ṭheuh an hlawh aṭangin an thawh dawn tihna a ni. CM leh Minister dangte erawh chuan an inhuamna angin an thawh tam deuh thung ang.

MLA Fund nuai 50 pawh MLA tinin Covid-19 do nan an hmang dawn a. MNF, BJP leh Independent MLA-ten CM Relief Fund-ah phal takin MLA Fund nuai 50 hi an chhung lut ang a, Congress MLA-ten CM Relief Fund-a chhung lut lovin, Covid-19 dona atan tho a ṭulna a piangah a hmang thung ang. Hei pawh hi Covid-19 dona tur vek a nih avangin a lawmawm hrim hrim mai a ni. Zep nak emaw, opposition MLA-te tan hian MLA Fund bak chu ṭanchhan tur a awm ve vak lo a, chuvangin, an bial ṭheuhah Covid-19 vanga harsatna tawkte chhawmdawl nan pawh MLA Fund hi hmang se la, thil âwm lo a ni hauh lo.

Kan MLA leh Minister-ten phal taka Covid-19 do nana an hlawh leh MLA fund an thawh hi a lawmawm em em a. Kan hun tawn azirin kan MLA rualte hian an la thawh belh zel bawk ang tih i ring ang u. Chuvangin, chu mite chuan an thawh tlem ber tih emaw, an thawh tam ber ti mai mai hi chuan i lo chiau hiar lo teh ang u. Kan MLA rualte hi an fakawm vek e!

ZU leh POLITICIAN-te hian inan deuhna an nei a, chu chu 'hnawm tin phur' an nihna hi a ni. Chhungkaw tam takin kan chhungkaw inenkawlna fel lo avanga kan fate sualna tam takah mahni indem tum lovin ZU leh ruihhlo dang vangah kan puh zel a, ZU kan haw em em a, sual bul berah kan ngai tlat a. Kan rilru tichhetu tak tak zawk hlemhletnaah erawh phak tawk te tein kan fihlim lo ru fur thung. Chutiang bawkin, kan rama thil ṭha lo deuh thleng zawng zawngah POLITICIAN-te kan mawhpuh a. Official leh mi hlemhle ṭhenkhatte avanga thil dik chiah lo thleng zawng zawng thlengin politician-te hian mawh an phur a; dik lo taka thil ti tura nawrtu kan nih vena lai erawh tumahin kan hre duh miah lo. Lehlamah, politician-te chu buklunga chuang an nih miau avang leh, lehlam pawlte beng hniam char char ngai an nih avangin an nihna bak baka chhiain an lang fo bawk. An zinga mi rinawm, hlemhletna laka fihlim tam tak awm vete pawh chu chirh hmang chuan vawmberh an ni ta tho tho ṭhin a ni.

A chhehvel ni lovin, thil nihna dik tak hi kan ngaihtuah thiam a ngai takzet a ni.