MAICHAMA MEI CHU A MIT TUR A NI LO Leviticus 6: 9, 13

Lev. 6:9, Hei hi halral thil hlan dan tur chu a ni : halral thilhlan chu maicham chunga a halnaah chuan zankhuain a tuk thlengin a awm ang a; tin, maichama mei chu a nung reng tur a ni. Bung 6:13. Maichama mei chu a nung reng ang a, a mit tur a ni lo.

He Pathian thu, Pathianin Israel puithiamte hnena Maicham leh inthawina halral thilhlan enkawl dan tura a pek hian tunlaiin ngaihven a hlawh hle niin a lang. Pathian Biak ina kan inkhawm theih tak loh avang hian maichama mei chu mit taah kan ngai a ni awm e. Thuthlung hlui chu Thuthlung Thar hlimthla a nih avangin kan tunlai huna a khingpui tur kan dap kual a.

Kan Pathian Biakin inkhawm te nen pawh kan hmehbel ta zel a ni awm e. Kan Biak In inkhawm nen hian hmehbel theih tur a ni reng em? Kan Biak In-ah chuan Maicham kan nei a. Chumia thu sawi a awm lai hi Maicham mei a alh laiah ngai ta ila, thu kan sawi loh hun a tam em em mai si a. Maichama mei chu a nung reng a ni, kan ti ti thei dawn em ni? Kan Inkhawm hian Maicham mei chu a nung rengah ngai dawn ta ila, tunlaiah chauh ni lovin, hri len loh lai pawh khan inkhawm loh lai a tam bawk si a. Tlaivar vara inkhawm kan nei ngai bawk si lo.

Chuvangin, kan Biak In inkhawm nen pawh hian hmehbel theih niin ka hre lo. In lama chhungkuaa kan inkhawm hi hmehbel dawn ta ila, a nei zing thei pawlin zing leh zanah kan nei hram a ni a, chhun leh zanah inkhawm kan nei thei bawk si lo. Chuvangin, kan chhung inkhwm nen pawh hian hmehbel theih chiah chu niin ka hre lo a ni.

Pathian thu chuan, ‘Chung ni hnua an hnena thu ka thlun tur chu, hei hi a ni, tih hi Lalpa thu chhuak a ni: an chhungrilahte ka thupek ka dah ang a, an thinlungah ka ziak bawk ang a, kei hi an Pathian ka ni ang; tumahin ‘Lalpa hre rawh’ tiin mahni ṭhenawm leh mahni unau an zirtir dawn tawh lo va; a te ber aṭangin a lian ber thlengin an zain mi hre ṭheuh dawn si a (Jeremia 31:33). Jeremia chuan, heng thil thlen hun tur hi ‘Chung ni hnuah’ a ti a. Judate hun leh ni a liam hnuah, Krista Isuan a thisena khawvel mite hnena tlanna a siamsak hnuah chuan, a tihna ni ngei tur a ni a. Lalpa chuan, a mite chhungrilah a thu a dah ang a, an thinlungah a ziak bawk dawn a ni.

Hebrai ziaktu chuan, Jeremia thu sawite hi la chhuakin, Krista thisen hna thawh ringtute tana Pathian thutiam ngei a ni tih min nemnghehsak a.

Thil hlan pakhat chauhvin tih­thianghlim tawhte chu chatuan atan a tifamkim tawh si a. A tih hnuah heti hian a ti a, Tin, Thlarau Thianghlim pawh chuan min hriattir bawk a: Chung ni hnuah chuan An hnena thu ka thlun tur chu heng hi a ni, Lalpan a ti; An thinlungah ka thupekte ka dah ang a, an rilruah ka ziak bawk ang, tia a sawi hnu khan, An sualte leh an bawhchhiatnate Ka hre reng tawh lo vang, a ti si a. Tichuan chutiangte ngaihdamna apiangah chuan sual tan thil hlan a awm tawh lo a ni, tiin.

He thu, Jeremi-a’n a sawi hi, Krista thinsena tihthianghlimna pawmtute chungchang ngei a ni tih min hrilh fiah a ni.

Judate inthawina, halral thilhlan chu zankhuain maichamah a awm reng tur a ni a, maichama mei chu a mit tur a ni lo. Hei hi kan tih dan tur la ni ta se, ava hautak dawn em! a chunga inthawina halral thilhlan awm reng tur chuan kan ranin a daih lo vang a, kan tuah tur thing pawh a hautak hle ang. Tin, Kan Biak In inkhawmte hi maicham mei kan tih nun reng dan tur ni ta se, chhun leh zan inkhawm a ngai ang a, kan va tlin dawn lo rua em!

Kan chhung inkhawmte hi mai­cham mei tihnun rengna a nih pawhin zing leh zan mai ni lo, zankhuaa chhung inkhawm neih reng chu tuman kan tlin a rinawm loh. Amah Pathian zawkin kan tih theih rual loh chu min tihsakin, kan thinlungah a thupek min dahsak a, kan rilruah min ziaksak ta mai hi, ava han lawmawm em!

Chuti a nih chuan, Maichama mei chu a nung reng ang a, a mit tur a ni lo tih chu tunlai hunah eng nen nge kan hmehbel tak ang? Pathian thu chuan, Pathian in in nih leh Pathian Thlarau nangmahniaah a awm reng tih in hre lo vem ni le?” min ti a (1 Korinth 3:16). Chu maichamah ngei chuan mei chu a nung reng ang a, a mit tur a ni lo. Maicham, mei a nun renga a mih miah lohna hmun tur chu, kan thinlung maicham hi a ni e.

Hripui a leng a kan inkhawm thei lo emaw, curfew a ni a ṭhenawm khaw­veng nen kan in hmu thei lo a ni emaw, Kritian tihduhdahna avangin kan Biak In te min hal chhiatsak vek a, vuak leh sawisakin kan awm a nih pawhin, kan thinlung maichama mei hi nung reng sela, mit suh se.

Tu mahin ‘Lalpa hre rawh’ tiin mahni ṭhenawmte leh mahni chhungte an zirtir tawh dawn si lo,’ tih hian i ngaihtuahna a tibuai deuh a ni ang e. Pathian thu leh kristian nunte hi chu kan in zirtir ngei mai. A ring tawhtute hi chu ‘Lalpa hre rawh’ tiin ṭhenawmte emaw mahni chhungte emaw kan inzirtir reng reng lo. Lalpa ringtu chuan amahah hriatna a nei mai zawk a ni. Lalpa hre tura kan zirtirte hi chu la hre lo hote zel hi an ni.

Pathian thu chuan, “Pathian fapa ringtu chuan mahniah hriatna a nei a ni a ti a (1 Johana 5: 10). Chumi hriatna chu ringtu thinlung maicham­ah chuan a nung reng ang a, a mit tur a ni lo. Khawvel harsatna hian kan Pathian Biak In inkhawm te chu min tihmihsak a ni thei a, Kan chhung inkhawmte pawh min tihmihsak a ni thei, Kan thilpekte pawh min tihmihsak thei ang; kan thinlung maichama Maicham Mei erawh chu Pathian min dahsak leh ziaksak, Thlarauva chhem nun lo ni zel rawh se.

- Commissioner Lalkiamlova