Check gate aiin duty an pawimawh

Central YMA-in an nawr avangin Mizoram sawrkarin tun hnaiah Sihhmui Zero Point bul leh Serchhip Sailiam­kawnah Myanmar aṭanga dan loa kuhva leh thil dang tawlh ruk venna tur check gate a siam thu leh police an duty ṭan thute kan hria a; a lawmawm e, han ti phawt mai ila. A pawimawh zawk erawh chu, check gate neih belh ṭheuh lam aiin, duty police-te'n an man duh leh duh loh hi a pawimawh zawk chu a ni.

Champhai Khan­kâwnah police check gate a awm reng a, Myanmar aṭanga kuhva phurhna kal­kawng hmun dangah pawh a awm mai thei. Check gate a awm reng chunga kuhva rah dan loa tawlhtute'n an paltlang theih chhan chu duty-te'n an man duh loh vang a ni mai; an hmuh loh vang a ni lo.

Nikum December thlaa zan khat, Kel­kang dáia kuhva rah man sa kâng ta chungchangah pawh khan, titia an sawi dan chuan, Champhai DC leh a hote'n kuhva rah phurtu truck an man hman loh an ûmna lama police check gate-a duty-te'n an pute thu lo chuan eng mah an hrilh theih loh thua DC an lo chhang nia sawite kha a mak asin.

Dr HL Malsawma ṭawngkam an sawi pakhat ang deuh­in, hlawh tam dan indawtin kawngpui­ah intlar ta se, check gate-a duty-te khan Champhai DC kha an hmu pha lo viau mai thei, a thuneihna lah a insàn hleih narawh. Chuti chung chuan, an chung féa awm officer, district khat hotu ber kha an thu hriat reng pawh an hrilh duh lo nia sawi a ni. DC tan khan a na ve ngawt ang, a thinrimthlak hle bawk ang.

Hei hian an tih­chian em em chu, Myanmar aṭanga dan loa kuhva leh thil dang tawlh rûk dang tur leh titawp tur hian check gate siam/neih belh ṭheuh aiin, duty-te'n an man duh leh duh loh a pawimawh fé zawk tih hi a ni. Check gate chu kâwi tinah awm pawh ni se, duty-te'n an man duh miau loh chuan awmzia a nei rêng rêng lo.

Chuvangin, check gate siam a nih avang ngawtin CYMA pawh an lawm mai tur a ni lo ang. Dan loa kuhva tawlh rûk an duh lo tak tak a, tihtàwp an duh tak zet a nih chuan, check gate siam ringawtah an lungawi tur a ni lo a, check gate chu a nih tur ang takin hman a ni em, kuhva tawlh rûk an dang tak tak em tih hi an en zui tur leh sawr­kar hmalaknaa an lungawina tur zawk chu a ngei ang le.

- Kezo