VUI HMUI PU MAI LOVIN...

Mihring hi chi hnih awm theih a ni a - thil engpawh lawm taka pawm thiam thei zel leh lawm nachang reng hre lova vuina tur hlir hmu ṭhin te. Kan kain sawi chhuak kher lo mah ila (thinlung hi thil zawng zawng aiin bum hmang ber, chhe lailet der a ni a; tuin nge hrethiam thei ang?- Jeremia 17:9), kan rilrua lawmna tur kan hmuh loha vuina tur hlir kan dap chuan, chu chuan kan thinlung ngaihtuahna mai ni loin he kan lei taksa ngei pawhin min ei ral vek dawn a ni. 

Thlirna chi hnihin kei­mah­ni leh kan vela thil thleng­te hi han thlir dawn ila- 

Thlirna chi khatna: Kan vel han thlir ila, thil ṭha aiin thil ṭha lo lam hlir a langsar a. Chanchinbu leh chanchin thar lamah ni se, thil ṭha lo lam chauh hi chanchin thar tling ni awm fahranin thil ṭha lo lam hlir kan hmu a. Kan ramri a buai a, mipui kan baihvai em em a, hri a leng mek a, damdawi hmuh chhuah a la ni lo va, kan Zoram pawh min run mek a ni. 

Zoram pawn thlir ila, ramri buai tho kan hmuh chu a ni. Ram dang pawh han thlir ila, ram dang nena buaina leh ram chhung buaina a langsar em em a ni. Heng zawng zawng thlir hian kan khawvel hi a va’n thimin kan va vanduai em! Hetiang natna hlauhawm len laia kan piang ringawt pawh hi anchhia a ni! 

Thlirna chi hnihna: Zinga nunna neia kan harh ringawt pawh hi a va’n hlu em! Hemi atan hian sum tam tak kan seng ṭhin a ni si a. Han hawi vel ila, malsawmnain min hual vel a, beiseina leh he thlir dan kan nei ringawt pawh hi a hlu a ni, hriselna tam tak a keng tel si a. He hrileng pawh hian ṭhatna tam tak a lo nei reng mai a. He hri vanga khawvel a rum laiin a lo chhuahna nia kan pawm China chuan an President hovin September ni 8, 2020-ah khan he hri an hneh lawmna an lo nei a. Awm hmuna lo in seh ruh a, lo phun phiar phiar pawh a awl khawp mai. 

Amaherawhchu, he hri avang hian chhungkaw tam tak inkar a ṭha thar a, nu leh pa tam tak buai em em, fate tan pawh hun thawl nei mang lo ṭhin khan chhungkaw tan hun an nei ve leh ta a. He hri avang hian khawpui lian tak tak boruak a ṭhat phah a, van boruak dumpawl te pawh kum tam tak hnuah an hmuh leh theih phah a, an lawmpuiawm hle. 

He hri in a ṭha lam zawnga hun min hman tir hlu tak chu ngaihtuahna fim kan hman hi a ni awm e. Hri len hma kha chuan kan nitin nunah buai reng rengin kan awm a, kan chhehvela thil thleng te pawh rilru chhungrila ngaihtuah hman lovin kan hmuh leh hriat ang ang kan thlir liam mai a. He hrileng avanga pawn chhuak thei lova kan awm hnu hian thu leh hla tam tak a hring chhuak a ni. 

Kristiante nunah hian a huhova inkhawm hi a pawimawh a, kan in tih chak tawn miau avangin. Koh­hrana inhmang em em, chhung­kuaa Pathian be thei miah lo te pawh a awm theih awm e - he kan hun tawnin a hrin inkhung hranin a hrin chu chhungkuaa Pathian biak a ni. Hei hian chhung­kaw boruak nasa takin a thlak a, rah ṭha tam tak a nei a ni. 

Heng tarlan tak bakah hian a ṭha lama min nghawng dan tam tak a la awm ang. Mizote kan in hmangaihna te pawh a lang chhuak nasa a, kan tun hun hman mek hi khawvel ‘history’-a chuang kumkhua tawh tur a ni a, a taka tawngtu kan ni hi kan vannei a ni. 

Kan han sawi tak ang khian vuina tur leh phunna tur kan hmuh piah chiahah hian malsawmna nasa tak, ngaia kan lo neih ṭhin hi hmuh tur tam tak a awm ve bawk a ni. Chumi hmu thiamtu chu mi vannei ber a ni. Rilru hriselna hian taksa hrisel a keng tel a, chu chu kan chetziaah leh kan ṭawngkamah a lang chhuak ṭhin. 

Social media lama ṭawngkam dengkhawng tak taka kan han ang bawrh bawrh te hi a hrisel lo tihna a nih chu. Chuvangin, kan tun hun hman mek hi rilru hrisel nena hmachhawn a pawimawh hun lai tak a ni a, vui hmui pu mai lovin kan phuloh malsawmna dawn tam tak hi thlir ila, kan nun a nuam zawk ngei ang.