ENG KAN TI NGE NI LE AW?

Mizote ngaihsan Israel ram chanchin a ṭha zawnga kan han hre ṭhin hian kan thlarau a ti lawm veng veng ṭhin a nih hi.

An Prime Minister ṭhin Benjamin Ne­tanyahu thusawi Evan K.Vanlalhlimpuia lehlin kha kan chhiar fur awm e."Thlalêr ram ro kan pârvul tir a, tunah chuan serthlum, pangpâr leh thlai chitinreng khawvêl pumpuiah kan thawn chhuak reng ta," tih kha.

Rinnaa Israel inti, Zofate hian tukkhuma kutsuih meuhin i ngaihtuah teh ang.

Maryland Univer­sity a Researcher-te chuan sattelite data aṭanga an tehin thingbuk leh maute pawh a ni ang chu, hloh nasa (Canopy lost) ah, hmarchhak State zingah a hloh tam pahnihna kan nih thu an tarlang.

Hetihlai mek hian...

Indian Space Research Orga­nisation (ISRO) hnuaia Space Appli­cation Centre-in kum 2003 leh 2018 chhunga India ram state hrang hrang sawm, thlalera chan mai theihna kawng zawh a tarlan zingah, hmarchhak State hi paruk kan tel.

Chu'ng zingah chuan Mizoram hi a hmasa bera tarchhuah kan ni tlat mai, a hmaiuan thlak loh viau mai.

A ṭawngṭial chuan, high rates of desertification-ah no 1 kan nih chu! Israel-in thlalêr an ti hring a, Mizoramin kan zotlang ram nuam hi thlalêrah kan chan zo mai dawn em ni le?

Desertification?

'Thlalêr a chan mai theihna kawng' kan tih hian, heti hian i sawi leh lawk teh ang.

Desertification tih chu, a ram leiṭha hmantlâk loh 'desert' a chang mêk tihna a ni ber awm e. Chu chuan, rona, ram­ngaw chereuna, huan thlai siam tlâk loh­na ram chhia a keng.

Desert kan tih hian, Sahara desert emaw ngaih­tuah­naah a lo lang mai thei. JF Dictionary in thlalêr (desert) a sawifiahna chu, tlansan, rauhsan, phatsan, thlahthlam a ti.

Chumi awmzia ni ta ber chu, Pathianin a min pêk kan ram kan enkawl dan leh kan sawngbawl dan a Israel ta lo em mai a, thlalêr hmun tih ngaw ṭhat leh chu sawi loh, a ngaw ṭha sa kan ti thlalêr zo mai tur anga lang hi a rilru nat thlakna lai chu a ni ta.

Phatsan ram, rauhsan tur ram ang maia min hmuh sak hi ava tlawm­ngaihthlak ve le.

- K.Lalfakzuala