Pu Lalduhoma Super CM a ni thei ang em?

ZPM-in Pu Lalduh­oma Chief Ministerial candidate atan an puang a; Congress, MNF te hi chuan puan hran ngai lovin an President te hi CM candidate an ni sa mai a. ZPM hi chu Pawl hrang hrang 6 infin an nih avangin, ‘tu President ber nge CM ang?’ tih zawhna a awm lo thei lova. Chuvangin, CM candidate an puang fel ta kha a ni a, chu chu nemngheh nan Pu Lalduhawma hian, ‘CM ka nih chuan Super CM ka ni ang’ a ti niin kan lo hria a, i lo bih hlek teh ang.

Pu Duhoma hi thusawi thiam, hriatna nei ṭha, leadership quality pawh nei ṭha ve khat a ni ngei a. Chutih laiin a han MLA ve hmasak khan MLA te phai zinna tur LTC kha zin si lovin a lo la ve tawp mai a. An lo tih ṭhin dan fote pawh a ni ang e. An han hriat chhuah khan thu leh hla a awm nak a, a LTC lak kha a pe kir leh ta tho phei chu a ni. Engatinge fimkhur lo taka zin lo puiin zin bill kha a lo lak ve mai le?

SSA sum nuai 700 zet lapse leh lapse loh chhuituah Chairman a ni a, a lapse lo a ti ngam si lova, a lapse a ti ngam bawk si lova. Pu Lalsawta leh Dr. R. Lalthangliana kha an dik ve ve a, an dik lo ve ve bawk tih ang deuh khan a sirtluk a, Paradoxical truth a ni e te a ti vel ta mai mai. University zirlai zingah chuan kha vang khan amah an ngaihdan a hniam phah hle.

Kha nuai 700 zet kha hman tura an tih kumah an hman hman loh chuan a lapse, a liam a ni mai a. Finance thiamten project thara passed leh a nih loh chuan a kum leh atan a hman theih loh tih hi an sawidan a ni a, High Court-ah PIL thehluh a ni a, an hmang hman lo a lapse tih tlukin thutlukna a awm nghe nghe.

May thla-a Chief Ministerial candi­date-a an puan khan ‘Aizawl hi City of Church (Biak In khawpui)-ah kan siam ang’ a’n ti liam leh puat a. Kohhran lian deuh chuan Biak In khawpuia han puan leh hranpa pawh a ngai lova, inkhawmna chu keimahni tawk kan nei ṭheuhva, Kohhranho pawnlawi taka han tih lungawi tumna mai. Thilsawi ṭul lo (practicable) tak mai a ni. A thawhpui turte pawh a rawn azeng a ni hek lo.

Hengte han ngaih­tuah hian Super CM atan meuh chuan ka iai deuh tlat mai. MNU a awm lai khan MNF leh India inremna hi khawvela inremna chhe ber a ni e, a ti a. Hun a lokal zel a, MNF N-ah a awm leh kha chuan he inremna bung leh chang tinah hian ka inrawlh vek a ti leh si a. A inrawlh vek si chuan engtitiha inremna chhe ber lo phuah chhuak nge maw a nih le?

Zoram hian CM chu kan nei ngei ang a, Super CM hi kan la hlat viau thei mai ang em? Nge amahin heng zawhnate hi chanchinbu-ah emaw rawn chhang se, ava ṭha dawn em.

- R. Thangkanglova