PARTY RUIHCHILH

Ram leh hnam din chhuah nan Party ruihchilh loh a ṭha, chumi tur chuan mipui (voter) te paw'n kan rilru kan hawn a ngai dawn a ni.

Kan harsatna lai: Hin­dui­sm emaw Judaism emaw Kristian sakhua zuitu naupang chuan kan nu leh pate sakhua chu nghet takin kan zui ve ṭhin. Chutiang chiah chuan Mizorama Party lian Congress emaw MNF chhungkuaa selian chuan kan bial (constituency)-ah ZPM candidate chu felin, rinawmin thlan (vote) tlak eltiang pawh nise EVM a vote thlak tura luh chiah hian kha a chih tlat ṭhin a nih hi tiraw u! Mahse, Hei hi voter kan ngaihtuah chuan a ngai hle a ni. Kan ram leh hnam dinchhuahna turin hruaitu ṭha, thuneihna lek thiam, a taka thawk tur kan thlan thiam a ngai. Vote thlak dawnah duhthlan thiam a ngai. Kan nin em em, kan sawisel fo ṭhinte kha hun a lo rei a, kan duh leh ta mai dawn em ni ang?

A nghawng : Party ruih chilh nghawng chu state rethei bera kan inchan tak hi! State rethei leh intodelh lo ber ni tura kan kawng zawh mek hi a thui tawh lo. Leiba a pung zel si. HIV leh cancer natna vei kan tam tual tual a. Mi state-ah chuan sum hnar lian tak tak an dinin an ruahman a, economy lamah an ṭhat phah em em a, an thang uak uak mek a ni.

Kut hnathawktute kan ti beidawng: A ngaihna hriat loh vang a ni lo, ram leh mipui hmangaih loh vang a ni. Kut hnathawktute thlai thar ngaihsak lo sorkar kum 30 chhung kan hrawn ta! Zoram mipui te'n ngaihtuahna thar kan neih a ṭul.

Tax (chhiah) lak dan felfai lo : State dangah chuan mipui leh sorkar hnathawk chhiah pek khawmin nasa takin ram economy a ti tha a. Mizoram hi chhiah pek dan mumal lo leh rualkhai lo ber a ni mai awm mang e. Entirna pakhat tarlang i la - sorkar hnathawk chuan Professional Tax kum tin kan pe ṭhin, state dangah chuan an pay scale a zir zela percent-a chhutin Professional Tax pawh an pe ṭhin an ti a. Keini state-ah chuan hlawh sang ber leh hniam ber paw'n tax pek zat a inang vek zu nia!

Putar rual: Mi ramah putar mi thiam rual ram hmangaih tak tak te'n ram leh hnam hruai hna an thawk a, keini ramah chuan putar rual mahni vua leh vangte chauh sorkar hnaa thun thiam kan nei thung.

Vision chauh nei bawhzui awm lo leh thutiam dur dur tih hlawhtlin leh tum chuang lote: A awm sa pawh chelh thiam lo hruaitu neih hi engnge kan tan a ṭangkaina? CSS Hindi teacher rual nupui fanaute hrawk chawm nana an hna rinawm taka thawktute chuan mittui tla chung leh rilṭam dangchara an ṭahawh hnu pawhin an nghak chhuak ta chuang lo a nih kha. Unemployment problem a nasa lutuk. Education-ah an hlawhchham a tih theih bawk. Ram hmasawnna bulṭhut, power and elec­tricity (kawlphetha) leh transportation (inkalpawhna kawng) kan neih ve chhun te chu hmeithai in tia lek leka siam a nih hlawm hi.

Kan duh loh tawh, kan hriat chian tawhte tho kan thlan leh chuan kan hmabak chu a ngai tho a nih leh dawn. Pawisa fai sem chur chur hi ram leh hnam dinchhuahna a ni lova, ram leh hnam dinchhuahna chu ram hnuk leh ro tlingte siam leh din hi a ni. Chu ngei chu a ni, i tu leh fa te'n an la dinchhuahpui tur chu.

- LZ Ralte