EVM kan ring tawh tihna em ni?

Kum 2014 a ni maw Lok Sabha inthlan dawna EVM kan han ringhlel tlat mai kha chu a state angin a va han zah­thlak haih haih tak, Phantom-a boruak nen kan media-te lah kha an han laktlak loh khawpa an han um ruak ruak a, thil phuah­chawp leh ni thei lova lang kha an thutak cheibawl a, MNF President Pu Zoramthanga ber khan EVM kha a rinhlelh thu kha a sawi piap piap mai si.

Khangho khan EVM hi an ring ta tihna em ni?

MNF hruaitute ngaihdan kha EVM chungchangah khan a phel phawk a, 2013 a MLA tling lo zawngin EVM tih­chingpen a nih thu kha an han tuipui ta tak tak a, MNF MLA Pu Zawma-te ho kha chuan engtiklai mahin mipui hmaah EVM tihchingpen thu an sawi ve lo, an tling tlat alawm EVM hmangin. Kum 10 meuh Chief Minister ni ve si khan EVM a rintlak lohzia, kum 2013-ah pawh Congress tlin chhan chu EVM a nihzia la sawi piap piap mai thung kha a nia.

Tlin loh hnu chuan chhuanlam pawh an dap mak thei khawp a, computer scientist ‘Michael Chhakchhuak’ inti kha MNF ṭan lam kha chuan kan han awih em em kha a nia!

Kum 2016 July 1, Diakkawn, Kolasib-a Kolasib Block MNF buatsaih MNF zawm thar lawmluhna in­khawmah MNF President Pu Zoram­thanga chuan EVM a rinhlelh thu hi a la sawi ta thova, “EVM set sa nena inthlan chu goal vengtu nei lo penalty pet ang a ni,” a ti nia mawle! Congress ho chak dan chu mak a tih vang nge, hre lo zawk mipuite bum an tum vang pawh hriat theih lovin mifing pangngai, ram hruaitu meuh ni tawh khan court-ah EVM-te an han khing mauh mai kha a ni a, politics-a hamṭhatna zawnna leh chak loh chhuanlamah chuan engpawh ti duh niin a lan phah ta a ni.

Kan ram inthlang meuh kha chu nuih tiza bang lo kha kan va han tam tak em, Phantom-a kha engkim hriaah kan ngai a, MNF lamin EVM an lo ringhlel thul, tunah hian EVM hi an ring tawh em? tihte hi mipui hmaah hian puang se. Tlin loh palh a awm leh thei a, tlin loh leh palh hnuah EVM kan ringhlel leh dawn nge ni ang, tihte pawh sawi chian law law a ṭha awm mang e.

Tunlai hian EVM hi sawi a ni ta reng reng lo mai a, EVM hi kan ring tawh tihna a ni thei em? tihte hi ka han zawt duh a. EVM hi kan ring tawh a nih chuan kum 2013 MLA inthlan leh kum 2014 MP inthlana chak lohna pawh kha pawm vek ni tawh se. State khan Chief Minister meuh ni thei siin “EVM ka ringhlel,” a han ti dum dum mai kha chu an MLA neih mi panga tan kha chuan, “Keini chuan kan ringhlel lo.

Kan tling,” va tih hi a chakawm dawn si a, an sawi ngam der si lo. Tunah chuan EVM kan rinhlelh loh thu tal sawi lawk tawh ila, chhuanlama kan hman tawh lohna turin.

- KC Lalthanmawia