DUMLUI CHAKAI FARM-AH INDEM A LA HUN LO VE

Fisheries department-in cheng nuai 54.7 sênna tura an ruahman, Dumlui, Kolasib-a Chakai farm kalpui mek chu a hlawh­tlinna hmuh a la ni rih lo.

He chakai farm hi bul ṭan chhoh mêk leh enchhin­na kalpui lai mêk a ni a. Sawisel emaw dem leh a ni lo baksaka sum senso aṭanga chakai pakhat man Rs. 9000/- anga lo chhut der chhin te phei chu a buaipuitu, sorkar hnathawk te diriamna a ni a. Chin zui loh atana ṭha, tih sa loh loh a ni. A sak hna (construction work) pawh thawh zawh a la ni lo hrim hrim.

Dumlui, Kolasib-a ‘Pilot Project on Crab Culture’ hi March 2020 aṭanga enchhin a kalpui ṭan chauh a ni a, chakai chi ṭha la khawmin a chi inthlah pung tura dah khawmna a ni a. Kolasib Regional Centre-a mi thiam te’n an vil a, rearing pond chakai 30,000 vel khawih theihna tura buaipui mêk a ni.

Tun dinhmunah Project cost aṭangin 32 lakhs hman a ni tawh a. He hna hi departmental works a thawh niin, hna zawh hma hian pond pathum siam zinga pakhatah chakai dah chhin a ni. Chakai hi an dah hmasak te hulhiapa an dah loh avangin a thi nual a, tunah chuan hulhiapa dah a ni tawh a, Chakai thi awm tawh lo tura ngaih a ni.

Chakai farm buaipui nana mamawh sum leh paite hi Kolasib DFDO-in a tahtawlin a pe chhuak ṭhin a. Pilot project mai a la nih avangin tun dinhmun­ah a hlawhtlin leh hlawh­chhamna sawi theih la ni lo mah se, a enkawltute chuan beiseina sâng tak an nei.

Fisheries department hian an theih ang tâwkin chakai farm hlawhtlinna tur hian an zir a. Mizoramah siam hlawhtlin ve theih a nih an beisei tlat a ni. India ram hmun hrang hrangah Kerala, Tamil Nadu, West Bengal, Karnataka, Andra Pradesh, Maharastra, Goa, Gujarat leh Odhisa-ahte chuan chakai farm hi hlawhtling taka siam a lo ni tawh a, Mizoramah pawh hlawhtlinpui theih a nih rin a ni.

Hetih rual hian Mizoram chakai ang chi - Aikam, Aifiar, Airang etc.-te chu India ramah khawi/ vulh leh inthlahpun tira farm anga buaipui an la awm loh avang leh, India ram state danga an khawi dan entawn tur pawh a awm loh avangin, a hmasa ber atan Mizoramin chakai kan neih ang angte farm anga enkawl hmasa theitu nih leh, India ramah a hmahruaitu nih tuma ngawrh taka beih mêk a ni zâwk.

Mizote’n lui sa kan ei nasa a, chakai phei chu tualchhung market-ah pawh a manhlâ tham takzet zet a. Tuna department lamin chakai khawina tur an siam hi a puitlin theih chuan ram economy chawikân nan thil ṭangkai tak a tling dawn a ni. Thiang­hlim zawka chakai kan ei theihna tur kawng a nih pawh a rinawm. A engamah hmaa sawiselna leh a tak ram hre chiang si lova ralkhat aṭanga inchirhtheh kan chîng ṭhin hi sim pawh a hun hle tawh a ni.

- Zobiakvela (Masena)