Check Gate siamna hi Kuhva lut ru tur dang lova Kuhva lut tawh dan tumna em ni?
Myanmar aṭangin kuhva ro an rawn tawlh lut ruih ruih a, dan lova sumdawnna lian tak hi hlawk eltiang pawh ni se a hmasa berah dan bawhchhiatna a ni phawt. A pahnihnaah chuan sumdawnna dik lo hlawk bik hian sum leh pai che vel (economy) a tibuai ṭhin tih chu Economics subject zir te chuan an hria ang.
Chu dan lova thil lakluh smuggling lian tak mai danna atan chuan Central YMA-in rawtna an siam a, an check gate pakhat zawk chu Aizawl tlan pelh tawh Sihhmui-ah an siam a nih tehreng chu!
A ruka kuhva lakluh hi tihtawp kan tum a nih chuan a lo lut tur hi veng mai ila a tawk. Mahse a lo luhnaah check gate siam si lova a lo luh tawh hnua a kal tlang lohna tura Serchhip leh Sihhmuia check gate siam hi chu a serh thenna ang vel a ni.
Mizoram sorkar hian kuhva tawlh ruk hi tih tawp a tum tak tak a nih chuan Zokhawthar leh Ṭiau lui kan theihna hmun (Police te hian an hre chiang lutuk) zawng zawngah lo chang mai se, tichuan Sihhmuia gate siam buai a ngai lovang. A luhna luhka hi tlem te a ni a, a hup phui theih a ni.
Kuhva smuggler ni ta ila Champhai District ka luhpui tawh chuan tumahin min man tawh lovang. Tun hmaa Police in 'mit an siai' avanga motor liana langsar taka an phurh kha a ngam awm tawh loh pawhin kuhva phurhna atan hian motor te pawh ka hmang mai dawn a, Sihhmuiah hian motor te hi an ti ding dawn der si lova awlsam takin ka smuggle thei tho dawn a ni.
Central YMA hruaitute tehreng pawh hi "Kuhva Checkgate siam turin kan nawr dawn," in tia a siam hrim hrimah hian in lung a lo awi em ni? Tuna mi hi chu Kuhva tawlh ruk danna a ni lova, Kuhva tawlh ruk sorkarin a veng ta ninawm taka a lanna mai mai a la ni. Smuggling hi tihtawp kan tum tak tak a nih chuan a lo luhna hmunah hian dan mai tur a ni.
Mizoram sorkarin zu lakluh a khap avangin Vairengte leh Mizoram luhka hrang hrangah check gate siamin zu an lo check mai. Assam lam aṭanga Aizawl pelh tawh Hualngohmunah te hian zu check gate siam ila, a lut tur lam dang si lo ila a mawl thlak dawn a ni. Hei hi kan Kuhva check gate siam dan hi a ni.
- Sangi Pa