Tu party policy nge kan thlan dawn le?

Mizoram political party te hian inthlan dawna an policy pui ber chu mipui tam ber kuthnathawktute mamawh tihsak tum a ni zel, ram a ralmuan chinah chuan mipui te hian kan tana tha ber tur economic policy nei tha a kan hriat party te chu lalna kan chantir (thlang tling) deuh zel ṭhin a. Kumin 2018 kum tawp lama kan inthlan atana party te economic policy neihte pawh kuthnathawktute eizawnna lama ‘rahbi’ ṭha zawk tuksak tum a ni ber vek mai.

Tunah hian mipuite tana rahbi tuksak tum dan chi 3 (thum), inang chiah lo mahse inhnaih tak tak leh tum ram (goal) erawh inang deuh vek kan nei a; tum ram inang mahse strategy (hmalak tum dan) a dang deuh thliah a. Heng tum dan chi 3 aṭang hian mipuiin duh kan thlan a ṭul dawn niin a lang. A tawikim thei angin thlirho dawn ila-

Pakhatah chuan rorel lai Congress party chuan, mipuiin kan hriat lar em em tawh NLUP, bul ṭan theih nana mipui mamawh sum leh thil dang te sem a ni ber a; tin, chu bakah NEDP (New Economic Development Programme) hming chawiin hmun ṭhen­khatah development hna pawimawh te departmental work siam an ni bawk a, thiamna bik nei thlante hnenah ‘micro start-up programme’ (central sawrkarin India ram puma hman tura NITTI Aayog program hnuaia a duan zulzui deuhin siam a ni) hming hmangin cheng nuaih 4 te, nuaih 5 te sem an ni deuh nual tawh a (hei hi MNF hotuin Rs. nuaih 3 emaw a aia tam emaw pawh kan sem ang a ti, an tih thin nen hian a inang em aw?).

Heng Congress policy/ program pahnih NLUP leh NEDP te ṭangkawp hmanga mi­­puite hnena bulṭanna sum leh development work contract hna sem te hi Congress party hian Mizo mipuite (kuthna­thawktute) rahbi a tuksak tum dan a ni ta a. Hetiang tluka ‘policy strategy’ ṭha awm lova ngaiin Congress party chuan inthlan hunah pawh sawrkarna an lak leh theih ngei an beisei hle niin a lang.

Pakhat dang chu MNF in kum 2/3 chhung mithiamte rawna a policy duanchhuah SEDP (Socio Economic Deve­lopment Policy), mipui tam berte tana eizawnna tling hna siamsak (self employment facilitation tihsak mai ang), mahni hna ṭheuh eizawnna ṭhaa siam puitlin pui, hna­thawktute thawh hlawh pek zel tumna a ni deuh ber mai a, a dawng thei chite hnenah grant, loan, subsidy, price support, etc. pek tum a ni bawk. SEDP chu ‘hna siam’ leh ‘sem’ tumna policy pawh tihsak ila a dik thei viau ang e; tin, zu leh drugs khuahkhirh an tum hle bawk. Anmahni sawi dan chuan “kan ministry hmasaah khan ar khawthimdai deuhin development program te kan lo enkawl a, kan tihsual leh tih loh palh te kan hriain tunah chuan kan ‘piangthar’ tawh a, SEDP hmang hian ‘economic revolution’ emaw ‘hnutetui leh khawizu luang ram’ ah Mizoram hi kan siam tawh dawn a ni” an ti a.

MNF hian mipui tam thei ang ber ‘mahni theih tawk eizawnna’ siamsak leh ‘zu permit tihtawp’ tumna policy te hmang hian inthlan hunah mipuiin sawrkarna an siamtir ngei an beisei hle niin a lang.

A dang leh chu inthlan dawn kuma Party thar lo piang chhuak ZPM chuan kalphung thara sawrkarna enkawl a, thlai thar hralhna ṭha neih chu ngaipawimawhin, sawhthing kg a cheng 50 leh hmunphiah kg a cheng 100 a lei zel tum chu policy pawimawh, Mizoram economy siamṭhatna ṭha berah an dah a ni. Kalphung tharah chuan Val Upa Council leh Super Chief Minister neih te a tel a. Sawrkarna chelh mektuten mipui hnena NLUP sum tam tak an sem aiin mipuite thlai thar tam theih sawhthing man to tha taka lei nan sum tam tak sen huam tha zawkah an ngai. Tin, sawrkarna lo chelh tawhten hmasawnna kawng min zawhpui thiam lo tiin ZPM chuan thiam zawk turah insawiin leh sawhthing lei tum policy chu mipui mamawh chhanna hmasa berah ngaiin sawrkarna chelh pawh an inrin phah hle bawk niin a lang.

Mizoram Political History emaw, Political socio/ eco­nomic policy neih tawhte kan thlir chuan, India ram Independence aṭang khan mipuite hian a hunlai mil zela policy fumfe tak nei party chu kan bawhhuk deuh zel mai. Entirnan, Lal ban (Mizo Union), Independence (MNF), Human right (P.C), Remna leh Muanna (Congress), Relief and rehabilitation (MNF), NLUP Nuaihkhat sem (Congress) te, Mizoram mipuiten kan thlang tling tawh hlawm a. Tunah hian NLUP sum sem (Congress) te, SEDP hna siam leh sem (MNF) te, Thlai thar sawhthing kg ah Rs.50 (ZPM), te hi (an hming lamtawi phuahsak an ni) Mizo mipui tan thlan tur zinga mi ni turin party pathum te hian an rawn zuar tan hlawm a ni a, tu party policy hi nge kan thlan dawn le?

An tum ram, kuthna­thawktute hamṭhatna tur chu ni vek mahse, an hmalak tum dan leh thil thlir dan erawh a inpersan hle hlawm tih a hriat a. Entirnan, Congress chuan mite eizawnna rahbi tuksak turin an bulṭan nana a mamawh te hnena sum pek (sum sem) chu tha bera a ngaih laiin ZPM chuan bulṭanpui nana sum tam tak (vbc 500 emaw) kum tina sem ral lova thlai thar, sawhthing thar chhuaktute hnen aṭanga man sang taka lei tum policy chu a zuar zawk a. Kuthnathawktute tana hamṭhatna tur kawng an zawh chu a inpersan ang reng hle mai. (Sawhthing hi a chingtute tan kumin angah hi chuan kg a cheng 20 chu hralhna rate ṭha khat a ni a, India ram khawpuiah te cheng 30 aṭanga 45 a ni tlangpui a, quality ṭha chi leh fai ṭha takte man erawh a sang thei hle bawk). ZPM thlir dana kal chuan hlawkpui loh tura NLUP sum cheng vaibelchhe 500 vel emaw sem kum tin ai chuan sawhthing thar chhuah lei nan cheng vaibelchhe 500 vel emaw sen ve thung chu, hralh hlawk leh kher loh pawhin (dah ṭawih pawh ni dawn se) mipui tan, thawk taima te tan, ṭha zawk turah an ngai a ni kan ti thei awm e.

MNF ve thung hian hmalak tum dan dang deuh, mahni hna thawh theih zawng thawkte chu an bulṭan aṭangin an thawh hlawh pek zel emaw an thiam zawng eizawnna ṭha chi hrang hrang a te leh a lian a siampui zel (self employment facilities) chu policy ṭha berah a ngai ve thung a. Party dangte ang deuh leh an aia uar mahin kum tinin cheng vaibelchhe 1000 thleng pawh SEDP atan senga mite eizawnna ṭha siamsak a tum ni berin a lang.

Awle, heng Party policy te hi an ṭhatna zawnah chuan ṭha tak pawh lo ni hlawm mahse an enkawldan (implementation) berin kawngro (hlawhtlin leh hlawhchham) a hril hlawm leh ngei mai dawn a. Chuvangin, an party policy ṭha tak tak (an tih) te hi engtinnge enkawl an tum, mipuiin kan ṭhatpui thei ngei ang em tih kan zirchian zel a ṭul dawn a ni.

- H.Lalhmachhuana, Zobawm In, Aizawl