Vote thlak dan dik

He thu hi keima irawm chhuaka ka ziah ni lovin WhatsApp lama ka thil hmuh hi a ṭha ka tih em avangin chanchinbu lama suan luh ngei a ṭha ka ti a.

Tunlai khawvel, mimal tu pawhin social media hmanga thu a puanzar theih­naah hian kan political party hruaitute beihna hi a nasa a. He thu ziak hian a khaikhawm ṭha hle a ni. A ziaktu hming a inziah loh avangin a ngai ang ang deuhthawin ka rawn la chhawng leh tawp mai a ni:-

"Pu Lal Than­hawla hi term 4 lai Chief Minister ni tawh a ni a, Mizoram tan thil ṭha tam tak a ti tawh. Mi invawng uluk leh hriselna ngai pawimawh mi, Leadership nei ṭha a ni. Mizoram hi hruai zel se i tih chuan Congress party vote mai la.

Pu Zoramthanga hi term 2 ngawt Chief Minister lo ni tawh, ṭawngkam thiam tak, mi zangkhai leh nelawm tak, a hun laia Mizoram tan thil ṭha leh rotling engemawzat lo ti tawh a ni. Mizoram hi a ni ngei hian min hruai leh se i tih chuan MNF party vote mai la.

Pu Lalduhoma hi IPS hna meuh kalsan a, Mizoram tana a hun ṭha zawng zawng theihtawpa hlan ve tu, mi dik leh chak tak leh thusawi thiam tak a ni. Zoram kuthnathawktute dinhmun vei tak leh khai chhuahna tur policy pawh nei ṭha bera inngai a ni. Ani ngei hian Mizoram hi min hruai ve tawh se i tih chuan ZPM vote mai rawh.

Pu Lalthanhawla, Pu Zoramthanga leh Pu Lalduhoma te hi a faktute leh ngaisangtute sawi ang lutuk an ni lo vek a. A sawiseltute leh ṭha ti lotute sawi ang em ema chhia pawh an ni lo vek bawk.

Chhungkuaa Pa­thian rawn chungin, ngaihtuahna fim tak leh neutral rilru tak pu chungin tu hi nge Mizoram Chief Minister atan ṭha ber ang tih thutlukna siam la, chutiang chuan vote thlak mai rawh.

Nangmah leh i chhungkaw bil emaw hamṭhatna tur lam ngaihtuah lovin Zoram tan hian tih theih ve ropui tak i nei tih pawm la, i ram tan thutlukna siam rawh le. I ram hian a mamawh che a, i vote hlu tak kha i ram chhanchhuahna turin hmang rawh le.

- HT Lalvensanga