CHIAH PUAM HRANG HRANG CONTRACT HNA HMANGA PAWISA CHIAH PUAM

Chiah puam kha kan la hria. Chiah puam chu pawisa dah pun a ni mai a, dan pangngaia pawisa chiah puamna chu Bank a ni thung. Bank a pawisa chiah hi chu a puam ṭha duh lo viau thung.

Chiah puam chi khat chu kan hria a, Mizoramah a hlawm lianpui a awm tawh kha. Khatiang ni chiah lo loan shark an tih mai hlawm lian pui ni si loa kal hi a la awm reng bawk. Hei hi buaipui hlawh tak pakhat chu a ni a, issue lian tak erawh a la awm hran lo rih niin a lang.

Chiah puam dang leh chu Compen­sation a awm dawn hian sum ngah (mihausa ni lo) pawisaa tuihal hovin an pawisa chiah puamna tur an lo zawng vat ṭhin. Ramneitute leh pawisa chiah puam tum inkarah hian Commission an lo awm ve leh bawk. Compensation awm tawhnaah hi chuan Inrinni bazar ang maiin an bazar suau suau mai ṭhin a, he bazar ti ti hi ngaihnawm ve thei tak a ni.

Chiah puam dang leh chu Ministry lama thiltithei or Tender chhuak hre thei deuh pawisa ngah si, suma an tuihalna reh si lo te hi an ni. A bikin PMGSY tender hre thei em em mai te tal velna a ni.

PMGSY Tender a chhuak ta a, hna thawh tum contractor-te chhan tur ni awm tak kha pawisa hre laklawh ho hian pawisa chiah puam nan an lo hmang ve ta a ni.

PMGSY tender an chhan hian Tender ammount aṭanga 30% te pek lawk a ngai ṭhin a, chu chu hnathawh tum ve miah lo contractor pawh ni ve chuang miah lote khan an lo chhang ve ta a. Chu chu an hralh chhawng leh ta ṭhin a. Tender ammount aṭanga 15% aṭanga 20% below vel zeta an chhan kha (hei aia hniama chhangte pawh an awm an ti) 15% - 20% vel zet zawtten an hralh ta ṭhin a ni.

A lei chhawngtute hian hlep neih an duh ve leh ta tho si a, “....Come to me” kha a lo awm ve leh chuan... In khaw kawng PMGSY Road an siam kha a chhe ta em em ṭhin a ni. Hna lei chhawng ve si, thawk hlei thei lo an awm ta ṭhin bawk a ni.

Hei hi Mizorama thil tihtawp ṭul number one a ni.

- Zmp Tlau