Tunge i driver?

Lirthei khalhtu driver pawimawhzia hi khualzin te, lirthei a chuang ṭhinte chuan kan hre chiang hle awm e. Kan driver a zirin him takin kan tum ram kan thleng thei a, chetsualna rapthlak tak tawkin kan boral phah thei bawk.

Tuna kan khawvel hman mekah hian tu nge kan nun hi kaihruai a, driver atan tunge kan hman mek? Ṭhalaite zingah kan nun kaihruaia driver pui bera kan hman chu mobile phone a ni awm e. Nu leh pa leh upa te ho pawhin kan driver atan hian phone hi kan hmang nasa hle.

Kan phone chuan khawvel tunlai ber berah min zinpui a. Thil thar tam tak kan tawng a, hlimna leh lawmna pawh min thlen ṭhin. Chutih rual chuan harsatna, lung­ngaihna leh manganna kawngah pawh min kalpui ṭhin.

Chutih hunah chuan kawng ṭha zawk leh kan nun tui­hal rehna turah min kalpui thei lo a, beidawnna in kan khat ṭhin.

Ngaihzawngte hi ṭhalaite zingah chuan kan nun kaihruaitu leh kan driver rinpui ber an ni fo. Hlimna leh lawmna tam tak min thlen a, thlamuanna famkim erawh min pe thei lo. Sum leh pai hi khawvela kan innghahna, kan nun driver rintlak berah kan ngai a ni. Sum leh pai chuan damna, hriselna leh khawvela thil awmte hi min neihtir thei deuh vek a. Mahse amah chauh hi kan driver atan kan rin chuan thlamuanna leh lawmna famkim min pe thei si lo.

Kan nun innghahna, kan driver atana hman hi tam tak kan la nei ang, mahse chungte chuan lungawina famkimah min thlen zo reng reng lo. Lal Isua hi i nun zawng zawng khaltu Driver atan i hmang tawh em? Ani tluka rintlak leh ?ha hi khawvelah leh a piah lam ramah pawh an awmlo a sin! Ani hi kan nun kaihruaitu, kan nitin nun zinkawng ah driver atan i hmang chhin ang hmiang? Engtiang taka rintlak leh ?ha nge a nih i fiah tehreng ang.

Amah Lal Isua ngeiin khawvel ram dang ni lo Pathian ram leh a felna chu zawng hmasa zawk tur leh chumi chu kan dah hmasak phawt chuan kan mamawh dang zawng zawng hi min pek bakah min la belh dawn thu min hrilh (Matthaia 6:33). Isua hi a ni kan driver dik tak tur chu.

Kan ngaihzawng, kan phone leh sum leh pai te chuan min kal bo san hun te, min phatsan hun te an nei fo. Nun beidawng ngawih ngawiha kan awm lai te in hmalam pan turin kan driver-ah an ṭang thei lo a. A chang phei chuan harsatna zawng zawngah min hruai lut zawk ṭhin.

Lal Isua erawh chu i beidawn lai bera driver rintlak leh dik, i dam chhung leh chatuan thlenga i mamawh dik tak pe theitu che a nihzia i hria ang. Amah chu ring tawp la, i nuna tel ve tur leh i khualzinpui tura a duh te pawh Isua kutah dah tawp ang che.

Driver rintlak Lal Isua hian i tan rin­awm takin i nun hi a khalh sak ang che. Lungngaihna, beidawn­na leh thihna hial i tawh hunah pawh i tan a awm zel ang.

Lal Isua hi kan nun zawng zawng khalhtu ni tlat rawh se.

- Rinfela Zadeng