Kan inthlang tur hi

Ram leh Hnam damna tak tak tur vei leh, chumi atana inpek hi a har viau reng a. Ram hnukpui Politics hlo har - Chakma chungchang, Tuikuk chungchang, UNO thupuan, Ramri, Luikan ram tha neih let leh thu, Ruihhlo do beihpui te hi tuna kan hruaitute zingah tih tak zeta vei engzatnge awm ang? Sawi phei zawng an sawi tlawr thei mai zel. MLA-a tlin nan, Minister nih vanga a mawihawiha sawi ve viau hotu kan ngah hmel.

Hei, MLA candidate an remfel deuh thup tawh ni hmel a ni a, thenkhat phei chuan an campaign nasa tawh hle, kan candidate te titi leh thu leh hla han ngaihthlak hian kan hnam tana hmathlir thui tak hriat tur a vang. Inchirhthehna an tih pawh kum dang ang bwkin a leng. Dawt var deuh pawh a leng leh tan hle. Kristian kan inti vek lawi si.

MNF-in MLA la ni ngailo mi 21 an din tir dawn a, Congress-in 13, la danglam leh thei tur a ni ang. Tunah hian thil thar pakhat, MPF thawhrah nge, kan piangthar hret a lo lang nghal, chu chu MNF Block thenkhatin candidate tih hautak loh nan tangka an thawhkhawm a, bial tinin entawn se, Party dang te pawhin ti theuh sela a tha ngawt ang. MLA candidate nih a hautak ka tih fo pawh hi Inneihna ang deuh a ni a, India dan pawh ni lo, party worker/ campaigner te ei leh in atana kan senso vang hi a ni a. Kohhranin inneih senso hautak loh dan kaihhruaina an siam a, zawm duh chu tlemte kan ni.

Aizawl N-II a ding tur (MNF) tan Unit ṭhenkhatin mahni intodelh an tum a, Rs. 10,000/- han thawh te an awm a, bial dangah pawh ti an awm, inthlan laia senso, petrol, ruaitheh, flag, pamphlet etc. candidate bel vek mai hi chu party tinin tihnep lama inel a ṭha ngawt ang.

Ruling Party campaigner te hian sum hi an lo neiin an chelek deuh nge nge a, ECI hian candidate pakhat tana senso phal zat Rs. 20 lakhs hi pel lo ṭheuh ila, mitthi ral leh pangpar dah te pawh mi tihdan pangngai anga tih ve mai, damlo kan nate pawh a pangngai ni mai sela, bial mitthi leh damlo an awm a, vote beisei rilrua sang tel senga candidate-in an buaipui thin te pawh hi chin tawk neih a tha ngawt mai. Chhiat tawk te pawhin MLA kher phut lovin lainate nen ṭanruala mamawh chu intum theih a ṭha.

MLA candidate ṭhenkhat lah hian vote hmuh beisei ru ranin miin an beisei lem loh pawhin ka lo tum ang e an ti thuai thuai zel a, lehlam candidate-in a lo hriat chuan tih ve phet an lo tum a; inelna ṭha lem lo, ṭha viau anga lang si-ah hian kan inhambuai fo. Campaign hunlai aṭang rengin therhlo kan uar a, chu chuan inthlan zawh thleng a nghawng ṭhin.

Party ṭhenkhat Unit lam hian candidate te rawn hauh lovin ruai tenau an lo siam ngawt a, ei zawhah a bill hi candidate an lo tum tir leh si te hi a ṭha lo ngawt mai. Michhe rilru, kutdawh rilru kan pu nasa tawh a, tlangchhuak rilrua kan thlak a hun ta hle mai.

Amah Pu Hawla’n kutdawh hnam kan ni a tih te pawh hi kan ngaimawh viau tak na a, a Zo a Vaiin kutdawh rilru hi kan pu nasa tawh khawp mai. Keini ang rual chin kha chu Matric kan pass hnuah chhungte kan pur nasa lo. Kan zir zelna tur te kan inhlawh chawp a, kan bei talh talh thin kha a ni a. Tunlai chuan B.A., M.A. mahni pocket money pawh intum thei lo kan la tam mai.

Hnathawh tur a vang alawm kan ti a, a dik lo, thawh tur hlirin a khat. Vawk a vulh theih, ar a vulh theih, lo a neih theih, thlai chi tinreng a chin theih. Buh ṭin khat hmunah tin 100 te, a aia tam te thingtlang lo neih ngawt pawhin a thar theih. Ram ruak ala tam lutuk, hetia a hnam nawlpuia kan piangsual chho ta viau mai hi nang leh keia mawh a ni.

Ram hruaitute, Kohhran hruaituten mawh an phur nasa zual ang. Israel ram khu 65% thlaler a ni. Mahse, an va intodelh si em! Kan ram aiin an ram khu sq. m. 309 velin a te lehnghal. An P.M. Benjamina chuan, ‘Thlaler kan ti parvul a’ a ti. ‘Abrahama Pathian, Isaka Pathian, Jakoba Pathian, kan Pathian YWHH thuthlunga kan chen chhung chuan chatuanin kan ral lovang’ a ti a ni. Keini hi a Kohhran lian lian te hi Pathian thuthlungah nge kan chen sum leh paia intih ropuinaah? Kan beramte dam tha a ram an awm lova, Pastor leh Upa Presbyterian ngawt pwhin 5000 chuang, Baptist-in chutiang dawn chu. Chungte chu inring zo lovin aikal Revival Speaker 100 dawn kan rawih belh a. Kan Beram hliam te kan tidam zo lo, min tihdam sak teh u kan ti a ni ber a, hei hi mahni leh mahni inrin tawk lohna (no confidence) zia mai a ni.

A chiang em? Chung mite tho chu Congress, MNF, ZPM etc. a awm te hi kan ni. Inthlan campaign lai a ni emaw, kan khawtlang nun siamthat a ni emaw Kohhran mite ngei hi insiam tha tur chu kan va ni em! Kan Puithiam, Upa leh Pastor rual 10,000 te hian tih takzetin kan ram hi vei sela, huai sela, Congress, MNF, ZPM member te hi an corrupt ngam lovang. In Beram ten in aw hriat kan duh. Pastor leh Upa ram vei naran kan ngah, vei tak tak an tlem. Kan tuina tawk chu Sorkhar inthlak vel vei hi ni berin a lang. Kan duhzawng sorkhar se, budget chalai veltu-ah tang ve ila kan ti a ni ber. A sual lua lova, kan hnam natna-ah hian mawh kan phur theuh. I ngaihtuah chiang ang u.

Kohhran tina ṭantu, Sanday School zirtirtu, Thuhriltu, Upa, Pastor te hi tih takzeta Pathian rawngbawltu ni ila zawng tun ai thlawt chuan kan zia deuh ang mawle!

- Rualkhuma Hmar