MNF piantharna khawiah nge?

Kumin Assembly inthlan lo awm turah hian MNF Party hian Congress Party lak aṭanga thuneihna chhuhsak an tumin an ṭang hle a. ‘Tunah chuan kan piangthar tawh’ te pawh an ti. Kum 10 deuh lai opposition a an awm hnu chuan Ministry chelh leh tur chuan pianthar mamawhna neih pawh a awm reng a ni. Mipuite hriatthiam theih tura an piantharna point ṭhenkhat sawi ta ila.

1) Matarte ngaihsak leh hriat zui kawngah chuan a hma ai chuan an piangthar.

2) District 3 tih­puitlin ngei tum leh Congress Party MLA te MNF a lawmlut hut hut lamah an piangthar bawk. P.C MLA lawm luh pawh an piantharna a ni thei ang chu. Mi hausa company a thawk mi te pawh lawm luh an ni zel.

3) An Party hruaitu lawk ṭhenkhat MLA a candidate lova Party awp lum leh enkawltu turin an awm tur hi piantharna dik a ni. India ram Party lian ber ni mek BJP pawh hian Aamit Shah chu Party enkawltuah an awmtir a ni.

4) Kawng hrang hranga mithiam leh tawnhriat nei ṭhate sawm khawm leh MLA candidate atan an nei deuh ṭeuh hi piantharna pawimawh tak a ni ang. Education lam mi te, health and medical lam mi te, Law lam thiam te, Engineering lam mi te, Civil leh Company lama thawk ṭhinte an khawnkhawm ṭha khat hle a ni.

5) Mizoram hi khawi­zu leh hnutetui luang ram siam turin an hmathlir tihlawhtlin nana SEDP an nei chu an piantharna pawimawh ber tur a ni ngei ang. Mahse he an SEDP ai hian ram hnuk tling lo zawk thu sepsel te te an sawi uar zawk fo mai. Party dang aia Ministry lakna chance an neih ṭhat thu te, District siam puitlin tum te, Pu Zira, Pu Rinliana, Pu Robert Romawia, Pu Thanliana leh midangte an Party a lawmluh te chu MNF thil buaipui ber niin a lang. He an piantharna hi ram hmasawnna tur atan an duhtawk mai dawn em ni le?

Ram hmasawn nan hruaitu ṭhate aiin Policy ṭha neih a pawimawh. Ram econo­my dinhmun chhia siamṭha tur chuan economist ṭhate chhawr a ṭulzia te chanchinbua ziakte pawh kan chhiar fo. MNF hotute pawhin he thu dik hi hriain rconomic lam mi thiamte rawnin Mizoram siamṭhat nan SEDP an duang chhuak chu piantharna pawimawh tak a ni thei ngei mai. Mahse chu an SEDP chu engtiang taka ṭha pawh ni se, an office Hnam Run a an hruaitu lawkten SEDP aia thu dang hlir an sawi ṭhin avang hian he ram hnuk program-ah hi chuan an la piangthar lo a ni mai em?

Mipui hian MNF hi lalna lo chantir tehreng pawh ni ila an SEDP hi eng tiangin nge enkawl an tum tih pawh mipu hian kan hre ve pha hrih meuh lo, chanchinbu lamah mi ṭhenkhat (mithiam)ten an ziah mai lo chu. An Ministry hmasaa MIP an enkawl ang emaw Congress Party-in NLUP an enkawl anga enkawl ve leh chu an pianthar dan tur em ni ang le?

Mizo mipui, kut­hna­thawktute, mi neutral te (intellectual leh tual lo te), District mamawh tawh lo ho te, Minister/ MLA, MLA ni lo te, sum hailut thiam mi ni ve kher lo te tan ṭhatpui ve theih tur hnam damna policy ṭha chu MNF hmathlirah (piantharna tur dang) chanvo a awm ve dawn em le? A awm ngai chuan eng ang policy nge ni a engtia enkawl tum nge ni ngai ang aw?

- R. Thangkanglova