Mipui zah lo Political Party-te

Tunlai chu Aizawl khawpuiah traffic kal dan a mumal lo fo mai a, hei hi a chhan ber chu MNF office Mizo Hnam Runa programme an hman ṭhin vang a ni. Party lian an ni a, mi 100 vel lek lenna an office-ah function an nei a, mipui vantlang kalna turah chair an hung rup zel a, sawisel ngam awm hlawm bawk si lo.

Mizorama hman ni lawka ding thar BJP pawhin an inkoh khawm dawnin mipui tihbuai duh lovin Mualpui an pan hram hram an ti. MNF hi chu BJP aia tam zawk tur an ni sa a, mi 500 lek pawh pungkhawm se traffic a buai dawn a, Aizawl khawpui traffic an ti jam ziah mai hi mipui an zah lo takzet a ni. Heti chiah hian pawl dangin (eng pawl pawhin) kawngpuiah ṭhutna te remin che ṭhin se a duh lo hlei hlei an nih ka ring. MNF hian mipui zah lo takin an office-ah hian puipun buatsaih tawh lo se a ṭha ang.

Congress pawh hian Vanapa Hall-a hun hman hi an ching ṭhin a, traffic a jam phah ziah. Anni hi chuan anmahni pual hall lian ve deuh an nei ta hlauh zawk a, chuti chu ni lo se mipui hmaa ṭhahnem tak anga lan duhin Vanapa Hall-a inkoh khawm lut lut an ching ve tho.

Ṭangrual pawl pawh hian hman ni deuh khan Vanapa Hall-ah mipui ko khawmin puipun an buatsaih a, kawngpui thlengin an inzar pharh a, Vanapa Hall ah hian mi 1,000 pawh ṭhutna a awm lova, tlema ṭhahnem deuh tura an inhriat hi chuan mipui tibuai lo turin programme hi duang ṭhin se a ṭha ang.

Vairamah chuan political rally nei turin hmun âwl zau lai an pan khawm ṭhin an ti a, Aizawlah chuan hmun zim leh lûna punkhawm a, mipui tibuai ngeia tam hmel taka lan duh political party-te avangin mipuiin kan tuar ngun tawh ta hle.

- RK Lalrammawia