CHIEF MINISTER CHAK

Party mala seat ngah ber ni lo mah se, sulhnu ṭha hnutchhiahtu na na na chu, CM a zawna term 4-na turin Nitish Kumar chu, Bihar Chief Minister hna an chelhtir leh ngawt mai nia mawle! 

Zoram khawvelah hetiang hi hmuh tur awm ve thei tawh se, kan zotlang ram nuam hi chhawrpial run tak tak a iang ngei ang. 

Keimah nen: Han ti ve khanglang ila, Nitish Kumar nen hian, chutia inhnim hnai tura ngaih tur chu ka ni hauh lo. Ral khata a sulhnu lo thlir bak, a ke bul han hnaihna chhan tur ka nei bik lo. 

A CM tirh khan a hmalakna turu lutuk, kan ṭhianpa-in Facebook-ah a rawn post a. Chu chu a kawng siam kha a ni. Kawng kha feet 3 a thukin a laihtir a, lung a chhung nghek mai a, a chungah cement concrete-in a chhung leh a, a chung lehah alkatra-in a zut mam leh pur mai. Bihar ho chuan chhuang takin, "noh inchi rasta" an ti. A awmzia chu, an kawng siam chu inches 9 a chhah, cement concrete leh alkatra in an chhung tihna a nih chu. 

Kum 2016 khan Bihar ram chhung  kawng tam zawk a siam tawh hnuin, Patna khawpuiah a sulhnu ka zuk hmuhpui ve a. Kawng chhawng pawh a lo siam tam hman khawp mai a, thui tak tak hi kan zawh a. Khawpui penhleh deuh, kawng an la siam zawh loh kan va dai thleng hlauh mai a. Kan ṭhianpa in Facebook-a a rawn post kha, a takin kan va hmuhpui a. A tlo dawn tih hi a lang reng mai a, rual awh hi a na ngawih ngawih mai a ni. 

Patna kan kal ṭum hian, thingtlang lam thlengin kan fang ve a. Kawng chu te deuh mah se, kan kalna chin chin chu, an lo black top vek mai a, mak ka ti tulh tulh mai. An sawi zel dan chuan, National Highway pawh, central aṭanga pawisa hman tur a lo thlen hma pawhin, hmanhmawh thlaka a ngaih chu, state sum hmangin a lo siam lawk ṭhin a, central sum lo thlen hunah a rul leh mai ṭhin an ti. 

Buh leh bala intodelh nana a hmalak dante pawh a thlen chin china riak thei mai kha a ni tlat. Bihar ka kal ṭuma fu leh balhla ka hmuh zozaite khan, an pu Nitish a hnenah, lawmthu an sawi mawlh mawlh mai niin ka hria. 

Ram hnuk innghahna chu CM ṭha: Khawvel chanchinah ram hmasawnna innghahna chu, ram hruaitu lû berah a innghat tih a chiang. Hmalakna reng reng, hotupa berin a phal a, a phurpuina tel lovin, a hnuaia minister ten an duh thuin, hma an la ngawt thei lo. Hotupa ber a chak chuan, a minister leh officer te an awm mai mai thei lo bawk. CM ber mai hi ram hnuk innghahna a ni tawp mai. 

Kan CM lo ni tawhte: Kan CM hmasa ber Pu Chhunga kha pa ṭha tak, mi duham lo, ramri pawh vei pha a nih thu kan hria. Mahse ram buai avang khan, eng ang taka chak leh, hma la thei nge a nih? hmuh tur awm hman lovin, ram buai kara che chhuak thei deuh tura kan ngaih, sipai lal Pu Ṭhena kha, a ṭhutthleng kan luahtir a. 

Pu Ṭhena khan hma thlir chu a nei ṭha kan ti deuh vek mai a, mahse ram buai a rawn sut vel dan kha, mipui khan kan hlau deuh nge ni, inremna thupuia rawn hmang, Pu Hawla te lamah kan hawi ta dual a nih kha. 

Pu Hawla te khan mipui thlabarna kha an rawn hmu fuh khawp a, mahse lal laklawh tawh kha chuan, han lal reng kha a chakawm viau a, mahse an lo intiam ve ngei tawh si a, "Lo haw ula, kan ṭhutthleng kan kian ang che u" an ti ve ta tak tak a. Pu Denga te ko haw thei an nihna kha, an chhuanawmna tak a ni. Development atan lei rem rahna buatsaihtu pawh an ni. 

Pu Denga khan Aizawl kawng zim kha a rawn vei nghal a, Bawngkawn aṭanga Chanmari kha a rawn zauh pawp mai a, kha kha a sulhnu kan sawi zui fo a ni ta zel a. Lei rem kan rap tawh bawk a, hmasawnna a kal ruak ruak ang chu tih beisei em em mah ila, Pu Hawla leh Pu Rama te inlal chhawk chhung hian, kan ram hian hmel danglam a put kan hmuh chu, Airport, University, leh Medical College kan neih hi a langsar zual chu a ni mai awm e. Mimal in ṭha pawh a tam viau tak e! 

CM chak kan mamawhna: Hei  kum 34 zet chu state niin lei rem kan rap tawh a, Central fatlum in nih siak ngawt hi kan hmathlir thiam dan a la ni rih tho a. Hei hian kum engzat nge kan awhtir dawn tih hi hriat thiam a har ta khawp mai. 

Tuna kan pute hian, central tuikhur hai chhuah tam an tum khawpin a hriat a, mahse hripui leng vang hian chet lak a la har em a, hripui leng hi han reh phawt se, han hai chhuak hiau hiau mai se la. Term tharah chuan, keimahnin tuikhur tlem azawng tal lo nei ve hman ila. Mi tuikhur ringawt ringa ṭhan chhoh hi chu, ṭawngkam thiam nihte a ngai leh lutuk a. Tin, fatlum nih ngai si, ni anga lan nuam chiah si loh hunte a awm a. An tuikhur kan chawi pah hian, tuikhur lo buatsaih thiam CM kan neih ngei ngei a ngai. 

CM ṭha na na na chu, tuma hai theih pawh an ni lo. CM ṭha miin an tehna chu, intodelhna langsar tak thawh chhuah an nei deuh zel. An lal chhungin ram hmel a danglam nasa hman ṭhin. Keini takngial pawhin Nitish Kumar te kan sawi ve tak fo chhan chu, Bihar mi kan nuih ṭhinte kha, nuih thei kan ni tawh miah lo tih, min hmuhtirtu a nih vang a ni. 

Manipur CM hlui Ibobi kha a thawm a na bawk, kawng zauh kha thupuiah a nei a. A hun lai khan Buldozer Ubobi an tih hial kha a nia. A lal aṭanga kum 10 hnuah Imphal-ah kan kal a, an khawpui kawng chu zau hem hem tak a ni. Khawpui laili a, Assembly House awm ṭhin pawh, khawpui sirah an lo din thar tawh bawk a, ralkhat aṭang pawhin hmuhnawm tham hian an lo din bik asin. 

Chutih laiin keini chu, tuna kan dinhmun hi kan hre tlang vek a. State pumpui fairel, khaw khat pa ho kharsak theih mai mai kha kan la ni si a, kar khat lek min kharsak pawhin kan buai nasatzia kha! 

Manipur chu Naga hovin ni 100 deuhthaw an kharsak chung pawhin, an chiai chelchul ve lem lo. Manipur aia dinhmun ṭha zawkah kan awm, anni chu Naga hovin an khar tawh chuan, Mizoram leh Myanmar bak, khawt chhuah dang an nei lo. Chuti chung chuan, an lo inkhawl im em thei bik ni tur a ni. Oil Depot, Vairengte-a kan neih ṭhin, kan hluihlawn daih laiin, anni chuan kan mangan laia kan va pur theih tur, Oil depot leh Gas filling station lian te an lo nei bik a. 

Keini pawh kan kawngten a zir hunah international border 2  leh state border 3 lai nei kan ni a, dan chep har ber tur zawk hi, kan la inpeih loh vang mai mai a ni e. He ram boruak ṭha tak leh, ruah tui tha tak dawng ṭhin hi, a intodelhna leh hma a sawn theihna tur chu, Chief Minister chak tak a neih leh neih lovah a innghat e.