Kawng chhâwng a ti leh tawh!

Kan pu ber, kum 10 dawn Chief Minister Pu Lal Thanhawla'n kawngpui chhia a hre ve lovin thin a tirim a, Chief Minister hlui, a hma kum 10 chhunga kan pu berin kawngpui chhawng siam a tum leh tawh! Aizawl hi India ram state khawpuia traffic jam awm lohna awm chhunah siam a tum - awi ka nu ka kâwng!

Tunah hian Aizawl Municipal Cor­poration enkawltu hi MNF an ni a, hei hi traffic jam awm loh min tiamtupa party tho hi a ni. MNF hian AMC-ah an intiam free wifi takngial pawh an pe thei lova, kawng chhawng siam chu a la hla ang. AMC hi Aizawl khawpuia parking enkawltu an ni a, hei tuna an pu berin 'parking problem awm lohna khawpui' siam a tiam hi lo chhinchhiah teh se.

Kan ram mipui hi kan vanduai tlang a, Chief Minister-in thu a sawiin kan thin a rim a, Chief Minister hluiin thu a sawiin kan nuih a za a, an thusawi hi kan awih lo ve ve chu a nih hi. Aizawl khawpuia sorkar office awm khawmna New Secretariat Complex aṭanga Upper Khatlaa fly over pawh siam theih a ni lova, mipui vantlangin an phal lo a nih kha; tuna Aizawl khawpuia kawng chhawng dah tum hi chu vision a ni lova, dream pawh a ni lova, duhthusam sawi ang a ni.

Mipui hi tun hma angin kan â tawh lova, bum theih kan ni tawh lo. Kawng chhawng hi siam tum teh se, PHE, BSNL leh SIPMIU lamin an khalh tawh a, kan kawngpui hnuaiah hian thil an phum chek chuk tawh a, kan Pu thusawi kawng chhâwng siamna tura ban phunna tur pawh a awm tawh lo. Kawng chhawng hi siam lo ni teh reng se, Zarkawt leh Dawrpui phei vela dawr hmun ṭha hi chu kan hnuai chhiah tawh ang a, in chhawng sang deuh deuhah hian dawr kan hawng thar sup sup dawn pawh a ni mahna le!

Mipui hmaa an party mualpho thupna tura Electronic Voting Machince (EVM) tichingpen anga a sawi duh aṭang tawh khan MNF President hi rin harsa ka ti tawh. An party MLA panga tlingte tana ngeiawm tak turin EVM kha rilru pe tak tak si lovin thiamchanna tawk turin an han khing a, an chak lo ta ngei kha a ni a, mi chal lang chin chuan thil hi sawi vel mai mai loh tur tih hi chian a hun tawh a ni.

Tun hnaia MNF President thusawi video darh chiam maia, "Aizawl khawpui hi India ram state capital zinga traffic jam leh parking problem awm lohna awm chhunah kan siam ang," a han ti mai hi chu, nuih a za lova, thin a rim hial zawk. India ram state dangte'n hmun âwl ṭha an ngahzia, an space neih tam dan leh awmze neia parking an siam chung pawha khawpui tak takah chuan indaih a harzia chu a hmu ngei awm si a, Aizawl khawpui hi khawpuia zawnga tawt ber mai leh lirthei hunna chu sawi loh tlanna tur pawh awm mang lohna a ni tawh a, vote duh luata thil ni thei lo mipui tiam fo hi sim se a ṭha khawp mai. Mipui min zah loh avangin thu ziak lamah pawh hian dim vak tur an ni tawh bik lo.

A sawitu pa hian a awih vak lo a ni ang, "Tunah chuan in awih lo mai thei... kum hnih thum hnuah chuan 'a lo ni reng tak mai' in ti ang," a ti a, traffic jam problem awm lohnaa siam hi chu a huphurh leh si deuh nge maw ni dawn ni le?

Kan Chief Minister-in kan kawngpui a ṭha tia a sawi duh luata, "Silchar pawh pel lo...," tia ama mipui ngei a ṭawng khum kha a huat thla la em em bawk a, mipui min tham lo a ni. Kawngpui chhiat avanga tuar mipuite min zah lovin min tham lova mikhualin kawngpui a ṭhat thu an sawi a nih pawhin mikhual ni ve lo, a hmuna chen chilhte ngei hian kan kawngpui hi a chhia kan ti a ni.

Chakma vote duh luata, "MNF PROMISE YOU A VIBRANT CHAKMA NATION," tih banner an tar kha Mizo rilru tinatu a ni a, khami hnua a hmaa ban phar darh darha thusawitu pa ber MNF President-in, "Ka hmu ve lo reng reng," a han ti maite kha, "Aizawl khawpui hi traffic jam awm lohna awm chhun state capital-ah kan siama ng," titu sawi tho a ni a, a mak leh ta lo a ni tunah hi chuan. Chakma ram leh hnam chak leh ropui tak din tiamna thuziak hmaa pangpar ṭhi awrh hi Mizo nationalism nen hian a inmil lo hle a ni.

Pu Lalduhoma pawh hian thu inkalh pui pui a sawi ṭhin an ti a, tun hmaaa sawi leh tuna a sawi hi a inkalh fo thu a hre chiangte chuan an sawi. Party awmna nghet pawh nei thei lova kal kual a nih vang hian a thusawi chu a lo danglam fo a nih pawhin a inhmeh phian ang a, mahse mipui hi dawt a hrilh tur a ni lo. Ani hi chu Chief Minister a la nih ve loh avangin kan la hlahthlem deuh ang.

Kawngpui chhawng, traffic jam awm lohna leh parking awm lohna min tiamtu hian Aizawl mipuite hi min hmusit a nih loh chuan amah hian a thusawi hi a hre chiang lo hle tih a chiang a, Chief Minister hlui meuh thusawiah chuan a mak a ni. Parking problem awm lohna khawpui India-ah hian a awm mang lova, khawpui tawt ber ni chunga he thil a sawi hian mipuite hi min ngainepin bum theihah min ngai a nih ngai chuan a tifuh lovang. Pakhat zawkin kan kawngpui chhia hre lo dera a ṭhatzia a sawi khan Zoram mipui a tithinur tawh bawk. Zu chungchanga, "Kohhran kan rawn dawn lo," titu pawh MNF a nih hnuah chuan zu zawrh a duh loh thute a sawi leh an ti a, mipui hi min zah lo mah mah a ni kan politician langsarte hian.

Duh duh sawi theia inngaite hi kan ziak fung hmang hian kan bei lêt ve tur a ni a, chu chu kan hlau bik lo a ni.

- Lalfamkima Ralte