Ruaiṭheh Politics, MPF leh Pol Party te Thuthlung zahlohna

Mizoramah inthlanna dik, sum sen nghek nghek loh dan zawngin Mizoram People Forum pian hnuah Political Party hrang hrangte nen hma lakho niin, political party president ṭheuhte nen ‘Thawhhona thuthlung’ an ziak ṭhin a, chu thawhhona thuthlunga an ziah thar ber zinga point no 2 sub no 4-naah chuan, "Mipui vangtlang tana ruai ṭheh leh picnic hi a hautak em avangin tih loh ni se," tih ziak a ni a, he thuthlung hi a ziaktute ngei political party te chuan an bawhchhe mek a, bawhchhiat luih dik takah ka ngai a, mipui zah lohna leh an thawhpui MPF zahlohnaah ka ngai a, a zialo hlein ka hria.

Khaw ṭhenkhat leh veng ṭhenkhatah, political party ṭhenkhat chuan vangtlang ruai siamin MPF leh Political Party te thawhhona thuthlung an palzut mek a. He thil hi MPF a tel Kohhran tan pawh tlawmthlak hlea ka hriat avang leh ruai ṭhehna hmun ṭhenkhatah hian thawhhona thuthlunga hming ziaktu ngei political party president te pawh an awm ve miau ṭhin avangin mak tihna hlirin ka khat.

MPF General Secretary Rev Dr Lalbiakmawia chu thingtlanga a zin laiin ka bia a, thawhhona thutlung a, 'mipui vangtlang ruai' tih chu MPF lamin eng nge an ngaihdan tihte ka zawt a. Ka zawh chhan chu he thuthlunga 'mipui vangtlang ruai' tih hi a kawh tum chiang hle mah se, political party te ruaiṭheh thu-ah hian mi tam tak ngaihdan a inang lo a, party bil hruaitute chaw ei khawm thlenga khap tur tih ngaihdan nei an awm vanga MPF dinna nghet hriat ka duh vang a ni.

MPF General Secretary-in min chhan dan chuan, "Lian vak loa thil an ti hi chu kan hrethiam a, entirnan hmannia Pu Robert-a te thil tihah pawh khan ei turin mi dang an sawm a, Khawlailung leh E Lungdarah pawh vawk pali te an talh a, sebawngte an talh a, khatianga ruaipui tak tak ang talh kha chu ti lo ang u, kan ti a. Hmanniah pawh Bungkawnah MNF ho khan an ti a, min rawn rawn a, 'lian loin lo ti ula,' kan ti a, puangzar loin ti khan lo ti ula kan ti a, a lianin an ti lo mai a,' mipui vangtlang tana tih mup mup kha kan duh lo a, 'mipui vangtlang tan kan ti lo,' ti mah se a kalhmang en khan a vangtlang riau mai a, chu chu kan duh loh bera kha a nia," a ti a. MPF General Secretary sawi dan aṭang hian thawhhona thuthlungin a kawh chu a ti chiang mai awm e.

He Thawhhona Thuthlung hi MPF leh Political Party ten an siam a ni tih hi hre lo lui, hre ṭha duh mang lo kan awm nual emaw a ka ti a, a zialo viau. Ruai ṭheh thu a lansarh chiah khan mi ṭhenkhat chuan MPF lam chu kan dem ta daih a, a ṭhen chuan ṭawngkam pawh kan duh tui vak lo; hetiang ngaihdan neiho hi mawlmang taka political party atchilh ching an ni duh viau. He thuthlung ziaktute hi MPF aiaawhin Rev Dr Lalbiakmawia, Gen Secy leh MPF President Rev Lalzuithanga te an ni a, MPCC president Pu Lal Thanhawla, MNF President Pu Zoramthanga, MPC President Pu Lalhmangaiha Sailo, ZNP President Pu Lalduhoma leh BJP President JV Hluna te an ni. Thawhhona thuthlunga hming ziaktute en hian, politics ngaihtuah ve dêt dêt, hotu sangte aia party a ruh zawk zawng zawng pawh hian he Thawhhona Thuthlung hi an ta leh an hotuten lungrual taka an hming ziah hnana an pawmpui a ni tih hi hre nawn leh se a ṭha hle.

Mak ka tih deuh chu, tunhnaia vangtlang tana ruai ṭhehna hmunah khan, he Thuthlung ziaktu an party president te hi an tel a, an awm ve ngei tih lai tak hi a ni. Thawhhona thutlung an ziak a, a ziaktu ngeite hian an party MLA candidate leh candidate ni mai turten MPF nena an thawhhona thuthlung an bawhchhia hi engahmah an ngai lo tihna a ni a, khap leh sawisel pawh an tum lo tihna a ni a, vawiin thleng hian eng thu mah an nei zui hek lo a, mak tih loh rual a ni lo. Khawtlang lam Hachhek bial lamah pawh Congress candidate hoin ruai an zu ṭheh a, min rawn hrilhtu phei chuan mi 5,000 an chuangin ruai an ṭheh tihte a la rawn sawi ve leh zel bawk. Hmun dang dangah pawh ruai ṭheh hi an lo ching hle tihna a ni.

MPF pawh rualkhai taka an kal a ṭul dawn a, party atchilh bur ni lote hian kan thawhpuite pawh a ngai ang. E Lungdar a Congress party-in ruai an ṭheh thu MPF Local Forum ten an duh loh thu an aupui hnuah Armed Veng Hall a MNF ruai ṭheh duh lohna pawh East II a bial chhunga YMA chanchinbuah an chhuah ve leh a. MPF Local Forum-te hian an tihtur chin ṭheuh an tih hi a ṭul hle dawn tihna a ni a, thlei bik leh duhsak bik nei loa an hmalak tur chinah an chet zel a ngai tihna a ni ang. MPF te hmalak theih chin hi a zau lo hle tih erawh a chiang a, chu chu nuihzat emaw, ho emaw tihsak pawh a ngai lo.

MPF hi kan ṭhiat vek law law ang a, Political party te hian thawhpui kan peih lo vek law law a nih loh chuan hming kan ziah hnanna thuthlung kenkawh hi political party hoin kan tihtur a ni ve thung ang. Chuti a nih loh a, thuthlung ziak tê tê a, kan palzut leh chiam chuan MPF a tel Kohhran tan a tlawm thlak lutuk ang tih hi hlauhawm tak a ni. Hetih rual hian MPF pawhin thawhhona thuthlunga inziak pawn lam hi dai vak lo se, beih leh mualpho an hmachhawn lo ve thei a, fimkhurna tur an nei ve tho mai thei e.

A nih leh heti zawng hian thu ti tawp chhin ang aw. MPF leh Political party te thawhhona thuthlung hi pal zutin, a nei nung nung a feng chhing chhing, tiin pawisa nei tam apiangin ruai theh mup mup se, pawisa te sem mup mup se, mi hausa hlirte MLA nih tumna ramah kan chhuah dawn tihna a ni ang a, an dik leh dik loh lam ngaihtuah miah loa mi hausate chauh MLA an nih theihna politics In lianpui kan sa a nih chuan, rethei si, campaign na motor pawh nei mang lote tan chuan a luhaithlak hle dawn tihna a ni a.

Sum tam tak insengso lo zawnga kan zavaia kan kal theihna hi kan ngaihtuah fo a ngai tihna a ni. Chu chu Election Commission of India lam duhdan pawh a ni a, MLA candidate pakhatin nuai 20 aia tam hman a phal lo rêng a ni, sum senso ngei ngei a ngai tih erawh sawi nawn ngai a ni lo. Mahse, pawisa ngah chauhte House a an ṭhut bik loh nan, mi harsa zawk, mi dik bawk site tan pawh kawng sial hi he Thawhhona Thuthlungin a kawh pawimawh tak a nih a rinawm.

- Lalnunṭawma Fanai