Chak tura i rin em ni i vote dawn?

Inthlan a lo hnai ta, party nghet nei sa chuan, an party an vote mai dawn, party nghet nei lem lo chuan, tunge ka vote ang tiin i buai maw?

I ṭhenrualte fak apiangah i rilru a inthlak kual a, i awm­na constituen­cy-a in candi­date zinga mi ṭha nia i hriat kha vote mai i tum a. An policy i duhtawk bawk si lo, vote thlak loh hial i chak rum rum a, mahse vote thlak hi khua leh tui ṭha nihna a ni si. Chutih laiin chak tur nia i rin party vote i tum ta mai em ni?

Heti zawng hian ngaihtuah teh. Hun rei tak hruaitu hrang hrang kan lo thlang chhuak tawh, kan thlan chhuahte hian hmathlir an nei thui lo hlawm em em. Delhi tlang thlengin mi khawsak dan an hmu ve vek. Mite chuan an kawng neihsa bak, ding leh veiah reserve zau tak tak an dah tih an hmu, keini ram hruaitu vete chuan, kawng zimte min laihsak a, a bak chu mimal ram atan an ṭheh mai. Kawng zauh leh tur chuan mimal hnena compensation tam tak pek phawt a ngai a, kawng siamna tur pawisa a tlem em em tawh mai a ni. Aizawl khawpui phei chu, zauh ngaihna a awm tawh lo a nih hi. Hmathlir nei lo hruaitute vangin kan tuar mek a ni.

Kan ram hruaitu, in sang in sak siak kan thlang chhuak hnem ta khawp mai. Tripura CM thi ta, kum 4 lai a zawna sorkarna siamtu, Nipen Chakrabarti khan, CM bangala a chhuahsan khan, a khawsakna tur in ṭha a lo la sa miah lo zuk nia mawle.

Hmanni lawkah central YMA buat­saihin, CADC dan lo va din a nih thua lungawi lo vin, kawng zawh an buaitsaih a. Chutih lai chuan, New Delhi-ah Union Home Minister Rajnath Singh chu NESO-in a office North Block-ah an lenchilh a. Mizoram aṭangin Ricky Colney (NESO Finance Secretary) leh Lal­nunmawia Pautu (General Secretary MZP) an tel ve a. He hun hi Chakma chungchang sawi lanna remchang ṭha nia hriain, Home Minister hnenah chuan CADC dan lova din a nih chungchang an sawipui nghal a.

Mahse Rajnath Singh a kianga mi Joint Secretary chuan CADC chu dan lova din a nih loh thu sawiin, Mizoram hruaituten dan kalh a ni lo an ti tiin a chhang a, engkim evidence chiang takin a pe nghal vek bawk a ni. Mizoramah kawng zawh a, Dan lova din a ni tiin mipuite kan au mek lai khan, central hruaitute kiangah erawh, kan ram hruaitute chuan "CADC hi dan vek a din a ni" tia an lo sawi thu a rawn auchhuahpui leh ta.

Hetiang mite hi i vote hlu tak i lo pek tawhte kha an ni. Party atchilhna nena i lo vote ṭhinte khan, ram hi an hruai dikin i hria em? Chhung leh khat leh party invulhna ngawt i thlahlel zel dawn em?

Mizoram hma­sawnna leh kawng dik a zawhna tur chu, i vote thlakah a innghat e. Ngaituah chiang la, mi titi leh boruak then velah innghat suh. Mizoram hi i hmangaih a nih chuan, i vote hlu tak kha i ta a ni e. Ram siam ṭhat nan hman tum ang che.

- Lalrinliana Colney