KHAWNGE MIZORAM CM LEH HOME MINISTER?

Tunlaia Assam nena ramri buai kan neih dan hi a mak riau. 'Dan lova lo pem lut Bangladeshi vang' kan tih laiin kan hmachhawn chu Assam sorkar official leh police te an ni leh zel si! 

October 9, 2020 ah Thinghlun a Pu Zomawia thlam hal a, thlai rawn suasamtute chu Karimganj DC leh a hote an ni. October ni 30 zana Silchar Mizoram House aṭanga Mizo driver-te bum chhuak a, Lailapur vela relhruk bosantute pawh Assam Police te tho an ni. 

Nov. 11 zan aṭanga motor lo chho-ah pawh Raju-a te kan han puh dawn dawn a, Barak news (barrak­bulletin) khan Assam Chief Minister aṭanga pressure awm vang a ti leh daih bawk si. 

BJP CM Sonowal-a leh NEDA Convenor Himanta Biswas Sharma te khuan kan CM Pu Zorama leh a hote hi min bawl kual ta mai mai niin a lang. Assam BJP hotupa Himanta Biswas Sharma hi NEDA a tel tura MNF te sawm hlawhtlingtu kha a ni. 

NEDA a an tel hi MNF te hian kum 2018 November 25 MLA inthlan khan ṭangkai takin an hmang a. Eptu party hruaitu Pu Lalduhoma phei chuan NEDA a tel pawl aṭanga sum leh pai dawng ṭeuhah MNF te hi a lo puh tawh a ni.

Mahse, BJP hi NEDA khaikhawmtu a nih vang nge, MNF te hian Assam BJP te hi an hlau hle tih hai rual a ni lo. 

Oct. 9 aṭanga Nov. 11 inkara ramri buai chinfel tuma hma an lak danah Assam BJP te pawi sawi an hlau hle tih a hriat. News aṭanga kan hmuh danin Assam CM Sonowal hi Mizoram CM rawn be hmasatu a nih bakah Prime Minister Narendra Modi leh Union Home Minister Amit Shah hnena thil awmzia zuk hrilh hmasatu a ni zel. 

Mizoram Chief Minister ve chu a hmui phuar ang tlatin a khawsa a, ni dangah sawi tur a ngah ṭhin nen! Inner Line,1875 pawmtu kan nih avanga kan thiam thu te tal lo zuk sawi ve awm hi a nia sin! 

Mipuiin kan lo hmuh dan chuan Mizoram CM hi a ngawi tluan ṭhak a, Prime Minister leh Union Home Minister a be ngam lova. Kan ramri buaina hmun tlawh ngam lo Home Minister kan nei bawk. 

Lirthei tangkhang an lo chhoh avang ringawta lawm a hlado chham tur kan la ni lo. Lirthei dan an tih tawp ni, Nov. 11 tlai lama Cachar DC-in Kolasib DC hnena lehkha a thawnah khan chuti maiin khulai buaina khu a fel dawn lo tih a chiang hle; hun engemawti chhung atan Lailapur mipuite khuan lirthei te hi chhuah rih mai mai an la ni. 

'Inner Line 1875 ramri kan pawm' tia Council of Minister meeting meuha pass-tu MNF sorkar kan hrawn mek a. Tun thleng hian MNF sorkar hian Inner Line, 1875 ramriah kan IR Police/ sipai te a duty tir ngam lo. Chuvangin, MNF sorkar hi ramri chungchangah hmai uang thei a la ni lo.