Hand sanitiser i chhawp ang u
Hman ní chu zing karah khawlaiah ka tei chhuak a, Pu Gandhi-a lim bula zing thingpui dawrah hian eng eng emaw ka'n ei/ in ve a. Thingpui bik kha a neitute'n thli kher loin mahnia inthlit mai tur a ni a. A herh hawna kha mi chi hrang hrangin kan inkhawih pawlh nasa dawn hian ka hria.
Dawr pakhatin dawhkan pahnih/ pathum an nei hlawm a, dawhkanah chuan chi (salt) leh sawhbâwl/ hmarcha an chhawp a, fiantê an chhawp tel bawk a. Chu'ng fiantête chu mi chi hrang hrangin an inkhawih pawlh vek mai bawk si a.
Chutiang a nih lai chuan, ka hmuh mai theih chinah chuan, Pu Gandhi-a lim bula mite mai bakah, hmun dang danga zing thingpui dawr dangte pawhin kut tihfaina (hand sanitiser) an chhawp lo vek mai a (ka hmu miau lo a). An thil chhawpte mi chi hrang hrangin an inkhawih pawlh nasat dan ngaihtuahin, hand sanitiser chhawp ngei tur an niin a lang a; mahse, an chhawp si lo. A rang lamin dawhkan tinah chhawp vek se a ṭha ngawt ang.
Anmahni dawrtute'n hand sanitiser chu an keng thlip thlep vek si lo a. Thingpui ka inna dawr nghaktu kha chu hand sanitiser chhawp turin ka ràwn nghal ngei mai a, tihlawhtling tak maw?
Aizawla dawr dang, chi hrang hrangte pawh hian dawra hand sanitiser chhawp kan ngaihthah deuh em ni aw, a tih theih a. Dawr chhunga lut kher loa kawngka (kawngka páwn) aṭanga indawr mai a ni ta fo a. Sawi leh dil kher ngai loa hman mai theih turin hand sanitiser chhawp theuh thei se a va tha dawn em.
Hripui leng la nasa viau mahse eibar zawn a ngai a, hna thawh a ngai a; inkhuahkhirh reng theih a ni lo. Tunah pawh kan zalen tial tial a ni hi. Mizoramah Covid 19 hripui hi a la leng nasa tih zing tin report aṭangin a chiang a; chuti chu ni mah se, sawrkar tan mipui khuahkhirh reng a rem tawh lo a, mipui pawhin kan ning a, kan tlin lo bawk a. Chuvang chuan, mahni theuh kan inven a ngai ta tak zet a, keimahni mai bakah, mi dang pawh kan ven tel a ngai bawk.
Kan zalenna hi inthlahdah nan hmang lo ila, fimkhur leh mahni inven a tul zual sauh a ni tih hriain, hripui laka invennate hi i ngai pawimawh lehzual theuh ang u hmiang.
- Zohmingliana