Zirna in hawn rawtna ka thlawp

Sikul kal leh tawh tura thu ziak a tam ta hle mai a, Vanglaini chanchinbuah ngei pawh chhiar tur a awm leh nual tawh a ni.

Kan Mizoram boruak han thlir hian Covid hri a la hluar tulh tulh bawk si a, mahse duhthlan tur dang awm tawh lovin sikul hi hawn pawp tawh mai tur a ni tih hi ngaih­dan mawl angreng taka ka lo neih ve chu a ni.

Tunlaia an sawi chu tleirawl hi enkawl an harsa a, inah an inkhung thei si lova, sikul an kal bawk si lova, chu chu an tan chuan sual zirna hun remchang tak a ni tawh mai. Chuvangin kan hotute hian sikul hi hawng pawp tawh se a ṭha ang.

Kan zirna pass percentage ṭha em em mai hian pawl 10 pass tur ni lo hri leng vanneihna changa pass an awm a, chutiang bawkin pawl 12 pawh zir mang lova online hmanga exam a pass ve mai an tam bawk a, college admission pawh hi a harsa lehzual hian a rinawm a ni.

Online exam hmaa pass pawh kha college-ah kan ziak lut seng tawh lova, tunah phei chuan an vai pass tawp tawh a ni ber mai a, college lam hian admission an pe seng dawn si loa buaina an nei dâwn niin a lang.

MZU lam an lo online ve leh zel hi chu a ho zozai a, university zirlai chin chu mask nena inveng chungin class hi kal awm tak a ni. University zirlai chin chu mahni inveng rual an ni a, chhia leh ṭha hre rual, fimkhur thiam rual an ni tawh bawk.

Hri hi a hlauh­awm tawh lo a ni lova, Covid vanga thi te hi chu natna dang lo nei sâ leh tar chak lo zawk lam an ni deuh zel a ni. Chumi avanga kan zirlaite quality tlahniam vek mai hi chu kan ven thiam a ngai tawh a, online class tih tawp hi a hun tawh mai lo maw?

Mi thiam zawk­ten rawn chhun­zawm leh thei se a lawmawm ang.

- Zosangliana