EVM hi i sawi lâwk ang u khai

Assembly Elec­tion hmachhawn mai tur Mizo mipuite hian Electronic Voting Machine hi a rintlak leh rintlak loh hi kan la hre lova, a chhan chu kan Chief Minister hlui meuh Pu Zoramthanga khan kum 2013 inthlan zawh hnu khan chiang takin, "EVM an tichingpen, EVM hi tihchingpen theih a ni," a tih kha kan la hre reng a, 2018-ah hian EVM hi tihchingpen theih a la nih ngai chuan kumin MLA inthlan turah pawh hian EVM bawk hman leh hi a ṭha dawn hawh lo mai.

Congress-in NLUP leh NEDP sem leh an tum a, anni hi a sema sem tak tak an nih vangin an sem leh duh tak tak mai a rinawm. Mahse a sema sem chi hi khuareiah hnamin a tuar dawn a, MNF hian NLUP ang deuh duangin SEDP an ti thung a, hei pawh hi cheng nuai 3 sem policy a ni awm e. Cheng nuai 3 sem theih chu a ropui awm riap riap si a, Ṭangrual Pawl hian 'Kalphungthar Mipui sorkar' pek tiamin sawhthing Kg khatah Rs 50-a lei an tum a, hmunphiah pawh Rs 100-a lei an intiam bawk. Heng zawng zawng hi inthlan huna vote thlakna atana kan hman leh tur EVM a rintlak loh chuan awmze nei lo mai a ni dawn si.

MNF hotute hi an zin kual nasain an

ṭang kawh tawh si a, a ruk taka BJP an nih leh nih loh chu a hriat hran loh a, NEDA-a BJP hnuaia an awm avang hian an BJP kher lo ve thei bawk. Heng an hnathawh zawng zawng hi kan EVM hi Congress hoin an tihchingpen si chuan a thlawn leh mai dawn a lo ni si! Ṭangrual pawl hian an pu hmui themthiam leh neutral leh kuthnathawktute vote hi chhawr tumin bei nasa teh mahse kan EVM hi a rintlak loh chuan awmze nei lo mai, darbenthek ri ang mai mai a ni dawn a ni.

A Congress teh­reng pawh hi EVM an tihchingpen thiam tho chuan an Chief Minister pawh mipui hmaah ṭap kual vel kher lovin an Vice President pawh hi bang kher lo se ṭha tur a ni. A banga ber lah chuan "Hman aṭangin ka duh lo," tiin a duh em em Congress thil tih apiang chu a sawi chhe leh ta zat zat mai a, hengte pawh hi EVM a rintlak loh chuan awmze nei lo mai a ni.

Inthlan a han zo ang a, kan politician te hian mipui tichiai tur tingin EVM hman tlak a nih loh thu leh rig a nih thu te emaw kha an han sawi leh piap piap ang a. Kan rilru put hmang leh kan thil tih duh ṭhin dan en hian, EVM tihchinpen a nih vanga tla an nih thu te nen lam an sawi leh duh ngei ngei dawn.

Mi pangngai chinin an nuihzat tur khawpa thu mawlmang leh belhchian dawn lo te pawh hi an party tana ṭha tur emaw an point hmuhna tur nia an hriat chuan kan ram hruaitute hian sawi hreh an nei der lo nia!

EVM hi a rintlak nge rintlak loh tih hi inthlan hma hian sawi lâwk law law ang u hmiang le.

- Lalremruata, Ramhlun North