Sum senna chuangtlai

Chhungkuain ei leh bar atan te, damdawi in awmna bill atan te, fate zirna atan te sum duh khawp hman tur nei si lo ila. Chuti chung chuan chhungkaw mamawh ni lem lovah pa berin sum hmang pur pur mai se, a duhsak zawng a naute hnenah sum awm ang ang chu ren lovin pe chhuak ta se, a nau dangte an lo vui ve bawk ang a. Chutiang dinhmunah chuan kan ram hi kan lut mek a ang ṭhin a ni, ngun taka han thlir hi chuan.

Aizawl kan vulh dan en hi chuan thingtlang tlangval tan thinrim loh chi a ni lo. Kan khua nen khaikhin ila tuna Aizawla kan veng (kan in luahna veng) lui kawr an thuam dan te, ṭul mang lova step rawng an hnawiha an chei ṭha chhen leh kea kalna te, zun in thlenga siamna atan hna an dap chawp lutuk leh kan khuaa hmasawnna lut ve miah lo te hi khaikhin loh theih a ni lo.

Hman zanah TV ah DIET office bul kawngpui chei bawl ka lo hmu fuh ve a, a ropui tehlul nen sorkar hnathawk hlawh pawh a huna pe thei lo thil tih atan chuan thil chuang tlai mai mai a ni.

Health Care lamah kan bill a tang nghek nghuk si a, chutih laia Aizawla kawng chung leh kawng hnuai inpawhna atana nuai tam lutuk sen ral hi thil chuangtlai a ni.

Lengpui Airport hi kan Chief Minister berin Covid lockdown lai pawh khan a tlawh regular em em tih chu news-ah kan lo hmu ve a, kan sum sen zat hi kan hre ve phak lova, thlawhtheihna a ṭum thei lo pawh ni lova pawisa nei lo chung chunga Airport sira mipui ṭhutna vel chei hi a chuangtlai a ni.

Khelmual kan mamawh tawk aia tam neih hi tute emaw sum siamna mai mai a nih vaih chuan hai lan hun a la awm tho hmel si a. Ka ṭhalai puiten min lo hrethiam se khelmual aia mamawh zawk kan ngah laia khelmual tana sum sen vak vak hi thil chuangtlai bawk a ni.

- Lalhmachhuana