CHHUN MUMANG

Zoramah hian sorkar thar a lo ding luah mai a, chu sorkar tharah chuan mahni Party in duhsak bing bikna hi a lo awm ve hauh lo mai a. Ram pum leh mi zawng zawng huap zo sorkar hi a lo ni a. M.L.A rualte chu Pathian ṭih mi an nih avangin, an hlawh bak, ei belh tur dap duh reng reng an awm hauh lo.

Minister rual leh MLA dangte chu, MLA hma ai khan an lo cher fat tawh mai a, ram leh hnam an hmangaih avanga an thawhrimna te chu, an hmelah a lo lang chhuak a. An thawhrimna leh an remhriatnate avang chuan Zoram chu a lo intodelh chho ta a, ruk rukna leh mahni

ṭanghma haina thawm ri chu a lo reh ta duak mai a. Zoramah chuan in ṭanpuina thawm ri chu a ring ber ta mai. Mipui lungawi lo kawngzawh leh bandh huaihawt thawm ri reng reng a awm ta lo bawk a. Zoram sorkar chuan chhung tinte hna thawh tur an duan fel vek avangin, hnathawh tur hre lova vir buai tumah hmuh tur an awm lova. Zoram ṭhalai rual lehkhathiam thawh sen loh hna a duan fel avangin lehkhathiam hna hmu lo awm lohna ram a lo ni ta a ni.

Lehlam ka va hawi phei a, sorkar hnathawk zawng zawng te lah chu Pathian ṭih mi vek an nih avangin an hlawh tura sorkarin a ruahman angah an lungawi vek a. Officer rualte hmaah eiruk theih, eiṭhen theih awm hnur mah se eiru duh leh ei ṭhen duh reng reng an lo awm tawh hauh lo mai. An eiruk duh hauh loh chhan chu, anmahni siamtu Pathian an ṭih avang leh ram leh hnam an hmangaih vang a lo ni a. Zoramah chuan BPL leh AAY an lo awm tawh hauh lo mai; retheihna chu umbo-in a lo awm ta.

Zoram chu pangpar mawi tak angin a lo lang chhuak ta a, tlawmngaihna te chu a par a lo vul chuk mai a. Khawfaia inelna mai ni tawh loin intodelh ber khua chuan nuai za an lo hlawh hial a. Khawvel hnam zahawm ber zingah Zohnam chu a lo tawlh lut ta a, ruk ruk awmlohna ram, rethei awmlohna ram, ram thianghlim Pathian lalna ram a lo ni a.

MLA atana mipuiin an thlan tlinte khan, kan party, kan Party tih awm hauh loin, lungrual takin a tlingho zawng khan sorkar an siam ho ta mai a. Nihna inchuh reng reng an awm loh avangin sorkar form fel a har phah phian zawk a. Zoram chu kan han thlir a, lehkhapuan siamna khawl han put maiah te chuan ṭhalai rual an lo thawk luai luai mai a, lehkhapuan kan ram mamawh bak te chu state dangah kan lo hralh chhuak ṭeuh ṭeuh mai a.

Plywood factory lian pui pui leh carpet siamna factory leh sawhthing sawngbawlna factory-ah te chuan ṭhalai lehkhathiam rual te chuan an lo thawk suau suau mai a. Electric current indaih loh awm hauh loin, ramin a mamawh bak chu state dangah kan lo hralh chhuak char char bawk a. Lehkhapuan siamna khawl ami tur mau lah chu khaw tin ami in mau an lo ching sung sung mai a, mau hralhna pawh dinchhuahna tham a lo ni a.

Plywood a siam zel tur a lo awm theih nan thing phuntute lah chuan namen loa tam thing an phun belh a, thing hralhna aṭanga an sum hmuh chu an lo hausak phah bawk a. Carpet siam chhuah nana ṭha ber Tung oil te lah chu kan ram hmun tinah Tung a ṭha duh em em vek a, an lo ching sung sung mai bawk a. Carpet siamna factory te chu khawchhak, khawthlang, chhim leh hmarah bun a lo ni ta thluah a. Tung chingtute chuan Tung aṭangin hausakna an lo hmu hlawm sup sup a.

Zoram chunglam chu Tungin a lo khat phui chuk mai a. Sawhthing sawngbawlna factory-ah te chuan ṭhalai lehkhathiamte chu an lo thawk tluk tluk mai a. Sawhthing chingtuten sawhthing khawlah an lo pe lut zung zung bawk a. Ka chhun mumang chuan, ‘Bekang ṭhat duhzia leh vaimim ṭhat duhzia i hre lo em ni?' mi rawn ti a. 'Ar leh bawng leh vawk leh sangha te chaw ṭha siamna factory saw en ta che, Vaimim leh Bekang aṭanga an siam tluk tluk saw' a lo ti a. An ran vulhna hmunpui lam chu ka han thlir a, za rual rual hi an lo vulh fer fur mai a, sang dawn dawn vulh te pawh an awm thluah. A chaw-ah buaina reng reng a awm tawh loh avangin an lo vulh tam thei a lo ni a. Kan khawpui Aizawlah motor tawt lutuk ṭhin kha a lo fihlim duak mai a, Aizawl khawpui thar an lo duan fel vek vang a lo ni a.

Aizawla office lian zawng zawng chu Aizawl khawpui tharah an lo sawn duak mai a. Motor zam reng reng a awm tawh loh avangin, mitin in hunbi dik an lo hmang ta vek mai a. Kawngpui te lah chu a dum tle zur mai a, Mizoram kawng motor tan buaina tur awm hauh loa enkawl a ni. Heng zawng zawng a lo hlawhtlin theih chhan hi, Minister te leh sorkar hna­thawkte lungrual tak a, tih tak tea an ṭan ho vang a lo ni a, hnathawhna sum eiruk ṭhen a awm hauh loh avangin a ni a.

Kan M.L.A te leh Minister rual te chu fak lo reng reng an awm lo a, an hmalakna kawngah mipui an thlamuang em em mai a ni. Ka chhun mumang hi a kilkhawr nen lam chuan sawi kim sen a ni lova, tuna tlemte ka han tar chhuah ang hian, Pathian mite, ram leh hnam hmangaihtute a thleng dik nghal thei vek a ni.

Mitin te Zoram siam turin i ṭhangharh ang u, kan nunin Lalpa i chawimawi ṭheuh ang u. Mitinin, diklohna hi kan hmelma min tichhetu a ni tih i hre thar leh ang u.

- Puithiam Rorelliana