Chakma huangtau hian min tiralkhel
Kan ram dinhmun en hian Congress leh MNF, ZPM leh BJP leh P lo lam sawi a hun tawh lova, Mizorama Chakma lian zel leh an len zel theihna tura MLA inthlan hman ṭangkai an tum dan leh boruak so mup mup hmu thiam lo hian Mizo mipuite hi kan lo thlamuang mai mai palh ang tih a hlauhawm ngawih ngawih a, Mizo thinlung hian political party nihna dah ṭhaa kan chet a hun tawh lo maw?
Congress MLA Dr BD Chakma chuan Congress aṭanga a ban thu a thehlut tawh a, he pa hian BJP a zawm tawh a ni. BJP hotu lian Aizawla a lo kal khan Dengṭhuama Hall kawtah chuan Chakma leh Bru te chu an hawi vah vah a, “Mizoram hi kan la la nge nge dawn,” tih hawiin an hawi ngam an tia lawm.
A chhan chu Chakma MLA satliah ni tawh lo, Chakma MLA thiltithei leh thuneitu nei tawh turah an inngai a, tuna an beisei ber chu hetiang mi hi MLA 2-3 neih a ni. Hetianga Chakma te tana MLA thiltithei tak nei thei tura an inngaih chhan chu tuna an behchhan chu BJP lam a ni ta a ni. BJP hian Mizoram Kristian state ah hian thuneihna an neih theih dawn phawt chuan sum an seng hreh dawn lo tih an hria a, an phur a, an huangtau viau tawh bawk niin a lang.
“Anti BJP” tia BJP hi sawisel a ngai lova, political party pakhat an nih avang hian hnam angin tawngpawng beih ta kher lo ila. Tuna thil awm dana Chakma huangtau ta lutuk leh anni hman ṭangkai tuma vai rama BJP hotu liante rawn chet dan zawk hi ngaimawh nachang kan hriat a ngai.
Mizo mipui min ṭhendarh a, Chakma vulh liana he rama lo luh an tum dan zawk hi kan dem tur a ni.
Mizo ṭhalaite hi kan harh loh chuan tuna kan buaina hi buaina lian zawk a la ni dawn tih a lang chiang chho ṭan mek a, Chakma intel khawm hian MLA inthlan hmang hian in tih len zel an tum tih a chiang ta a ni.
Aw, Mizo ṭhalaite u, Mizo nulain Chakpa pa parṭhi a la awrhtir ang, tia kan Chief Minister hlui Pu Ṭhenphunga thusawi an sawi ṭhin kha tunah chuan a tak a chang tawh a ni. Tunah hian YMA hi an target ngam chat chat tawh a, tun inthlanah hian invulh len an tuma chu vangin BJP an bêl a, hei hi thil hlauhawm inmung mek a ni si a, kan hriat chhuah tlai chuan kan ram hian Chakma vanga harsatna lian a tawh hunah he thuziak hi lo chhiar nawn leh ang che.
Min tiralkhel em emtu chu Aizawlah an lo kal a, an zam lo hle tawh kha a ni a, BJP bik a mala sawisel chuang lo hian Chakma vulh lian tura tun hma aṭanga Congress, MNF leh tuna BJP chet dan hian kan ram hi min la vêl lêt dawn lo maw? tih zawhna hi Mizo ṭhalaite ka zawt a che u.
- David Lalthantluanga Ralte, Mission Veng