BYE BYE KHA

Kan ram hi chu a mak ngawt mai! Kan ramah hian thil mak tak tak a va thleng nasa em! Tunlaia thil thleng zawng zawng hi sawi sen pawh a ni lo va, chutih rual chuan ‘bye bye’ hian a khaikhawm ṭha hle lawi si a, chuvangin ziah makmawh, sawi makmawh te pawh kan ti thei awm e.

Kuhva chungchangah sawrkar thuneitute lakah FIR thehluh a ni a, a thilsual tu zawkte zaka kimkit chu sawi loh, interview hial an pe a. Khang thil a thlen khan kan mak tawh thu te, kan hnam ang zawng pawhin mahni zawhna kan inzawt a nih kha. Kha zia kha tun Ramtuk thla ni 24, 2022 hian Assembly Session-ah kan hmu leh ta chiah a ni.

ZE HLUI

Ze hlui tam tak hi a hun lai chuan sawisel a hlawh fo va; a aia tha lo zawk a chhuah hnuah erawh a ngaihawmin hun kal ta min thlir tir vawng vawng a nih hi. Mizo te hi khawtlang mitin min thunun kan ti thin a. Khawtlang mitin kan inteh a, mi tehnaa tlin loh kan hlau fo. Zaithiam leh hla phuah thiam Vanlalsailova’n a hlaah “mualpho hlau mai ringtu” a ti a. A ni tak tak, mualpho kan hlauh avang hian ṭha awmin kan awm ṭhin a, mualpho kan hlauhna hian thui tak chu a ṭha lamah min kal tir ve ṭhin, thleng thuk lutuk lo mahse. Ze hluiah chuan ram hruaitute pawhin mipui tih der nan tal an ṭha der a, than mawi an tum ṭhin. Khang hunlai te kha a va ngaihawm em! Khang hun - ram hruaitute ṭhalaite’n kan ngaihsan a, beiseina nena kan thlir lai kha. Khang hunah te chuan beiseinain ram hma bak tur hlim takin min suangtuah tir a. Mipuite’n ngaihtuahnaah in sang kan lo sa a, rawng chi hranga chei mawi suangtuahnaa Mizoram kha thlirin hun kan hmang ṭhin kha a ni a.

ZE THAR

Ze tharah chuan inthup ṭit ṭet a awm ve tawh lo. Ze hlui put hun laia thil sual kan tihah khawtlanga kan inthlahrung dak ang nun duhawm kha kan nei tawh lo. Thil sual tihin zahna min thlen tawh lo va. Ram hruaitute pawhin eiruk an zak tawh lo va, mualphoah an inngai lo a ni chek ang chu. Kan Kristianna hian sawrkar sawi chhiat te, sawrkar laka helte min ti tim a. Kan kalphung ngaihtuah hi chuan ṭhalai phun ri hi a tlem teh e, beiseina kan hloh tak vang pawh a ni mahna. Mipuite sawrkarah hian Instagram lama ram hruaitu lu ber account pawh comment theih loha dah a ni te hian pulpit nen inanna riau a nei; pulpit pawh hi hnial theih loha thusawina hmun a ni tlat a ni. He mi aṭang ringawt pawh hian mipuite rahbeh kan nihzia a lang chiang hle.

Kuhva chungchang te pawh thil lian tham tak a nih avangin sawrkarin hma la rap rap ngam se tih ngaihtuahna nen kan thlir a. DC lakah dan bawhchhetuten FIR an thehlut ngam tlat, dan bawhchhetute hian kan sawrkar, kan ram hruaitute hi an lo hre chiang ber zawk a nih dawn hi. Khang te pawh kan ram pelhah chuan an man hmak mai a, damdawi a lo tel ṭeuh a nih kha.

BYE BYE

Kuhva chungchanga mipui rilru na pawh a la dam hman lo tihah kawng siam chungchangah Assembly Speaker meuh a’n mualpho leh a. Inkiltawiha inthlahrung tur a nih tehlul nen Oppo­sition Party (INC & ZPM) te rorelna hmun aṭangin an chhuak a, chutah Speaker ber chuan nui huah huah chungin a ‘bye bye’ lawp lawp tak kha. E, kan sawi hmaih dawn, Speaker-in rorel ṭan dawnah Pathian Thu Thiang­hlim a chhiar tak kha mawle!

Ram hruaitute hi mipui thlan tlin an ni a, mipui aiawh an ni. Opposition party te an chhuak nalh kha a lawmawm hle, anni pawh kha ram mipui aiawha chhuak an ni. Eiruk sum hi mipuite pek khawm kan pawisa te, hma kan sawn nana central aṭanga lo kal te an ni a, chuvangin kan chan aia chang te rorelnaa awm kha kan chak lem lo a ni. Assembly Speaker-in a chhuak tur te a ‘bye bye’ kha an ni chauh a ban a vai khum a ni lo va, mipuite ban min vai khum a ni; chhuak turte a nuih a a tham lo kha an ni chauh a tham lo a ni lo, ram rorelna hna leh mipuite a thamlohna leh a hmuhsitna a ni. A lo nuihpuitute pawh kha an bang chuang lo, rilru hmun khat pu an ni.

THUAWIHNA HI

Kan pi leh pute hi mi zai ngai ṭhin an ni a, kan kristianna nen pawh a inhmeh viau. Kan Bible-ah rorel tu te thu thua awm tura mipuite fuihna a awm a, chumi rual chiah chuan roreltute mawhphurhna tam tak a inziak tel bawk. Bible-ah hian thuawih nihlawhna kan hmuh rualin roreltu ṭha lovin ro a relnaa dan bawhchhiatnain mipuite a chhanhim thu kan hmu tel bawk. Daniela hun lai te pawhin Daniela luhlulna leh ram roreltu thu a awih loh avanga Pathian hming a ropui dan kan hmuh kha.

TLIPNA

Mizote hi hnam dawhthei tak kan ni; kan tawrh ang tam tak hi hnam dang chuan sawrkar thil an tih chhiat a, an hal chhiat ṭhinna a ni. Mizo ṭhalaite hi chu kan fel asin, tih lungawi lah kan awl. Ram hruaitute kan ring zo tawh lo te, an thusawi kan nuih mai mai te hi ram hruaitu tan chuan tlawm thlak tawpkhawk a ni.

Ram dang pawh thlir ila, mipui dawh­theihnain a tlin loh chinah chuan ‘revolution’ a chhuak ṭhin. He mi thleng lo tur hian mi zawng zawng hi insiamṭha tlang ila, inzah tawnin Pathian hi tih tlang ila; kan buaina hi chinfelin a awm ngei ang.

- Debbie Rinawmi