Budget thar a rintlak lo
Budget thar, kum 2022-23 chhûnga Mizoram sum hmuh leh hman tûr chu pharh a ni leh ta a, enchian a dawl lo leh hle. Department hrang hrang sum hman tûr ruahman enin a lungawithlak loh a, chumai ni lovin an ruahman ang hian sum hmang dawn se kal ngaihna awm miah lo niin he kan budget thar hi a rintlak loh hlawm tawp.
Mipuiin ngaihvenin hria i la, inkhualtelem chin tawk hre lo ang maia kan awm hi tâwpin kan ram hi siamṭhata a awm theih ka ring teh tlat nia!
Kan CM, Finance changtu ni bawk Pu Zoramthanga’n February 24, 2022-a budget a pharhnaa a thusawi kha ka chhiar a. Heng hi mak ka tih zual 10 te an ni.
1. Covid 19 hrileng avânga kan sum hmuh tûr hmuh loh tamzia leh kan economy ṭhat lohzia a sawi laia kum kal lai 2021-22-a kan state sum thawhchhuah 29.98% laia a pun thu a sawi bawk si kha!
2. Mizoram Resource Mobilization Committee din a, sum lak belh theihna tur leh sum hman chhuah tihhniam theih dan tûr ngaihtuah tum a nih laia Manpower Assessment Committee din a, post siam belh leh post ruak hnawhkhah dân tûr an buaipui tûr ni bawk si kha!
3. GSDP punna chungchang sawia industrial sector-a a punna tlêm avanga duhthu a sam loh thu a sawi lai a budget-a kum kallai aia cheng nuai 1,000 chuanga industry department pawisa chan tur tihtlêm a ni si hi!
4. Revenue Surplus cheng vaibelchhe 1,419.69 neih tum thu leh Gross Fiscal Deficit 5.20% a nih tur thu a sawi kha!
5. Leiba enkawl kawnga hma sawn hlea insawi sia kan Sorkar leiba tling khawm cheng vaibelchhe 12,553.08 ni tura chhût a nih thu a sawi kha!
6. Kumin budget hi nikum aia cheng vaibelchhe 2,859.26 laia a pun thû a sawi lai a pûk tûr hrang hrang a sawi belhkhawm cheng vaibelchhe 5,130.29 a ni si kha!
7. Sum sên tûr lam a sawinaa revenue expenditure tûr chêng vaibelchhe 10,006.51 a nih thu leh kum kallai aia 8.57%-a a pun thu a sawi kha!
8. SEDP atâna cheng vaibelchhe 700.00 ruahman a nih thû a sawi laia cheng vaibelchhe 350.00 chauh sem tur nia a sawi si kha!
9. FCS&CA, PWD leh Printing & Stationeries aṭanga mipui aṭanga chêng vaibelchhe 182.00 hmuh lêt tûr thu a sawi laia thla tina mipuiin bill kan chhûnluh electric bill leh tui bill aṭanga sum hmuh tûr a sawilang miah lo kha!
10. (Kum tirah a tam dawn tia kan sawi lawk ang ngeia) supplementary demand cheng vaibelchhe 6,025.44 lawih a nih thu a sawi kha!
11. CM thusawi ni lo, mak ka tih mai mai chu maw... Department hrang hrang demand pharh tûr ena budget pung leh kiam te leh a changtu minister te enkawpa ngaihtuahna tithui tak awm hi mak ka ti bawk!
- Vanlalruata