Rin aiin an la khauh ang

MNF hian mi pahnih pathum lakluh avanga sor­karna siam mai tur anga an inngaih chuan inngaihtuah nawn leh rawh se. ZPM hian mi ṭha an neih avang ringawta sorkar tura an inrin chuan inngaihtuah nawn leh rawh se.

Kum 10 ro an rel tawh avanga kan nin tawh, tun hnaia mi challang ṭhenkhatin an chhuahsan mek Congress hi rin aiin an buk a la rit dawn a, inthlanah hian Congress sut hi a khauh ṭhin a ni.

Congress tihtlak duh chuan MLA bang hi innghahna tur a ni lova, grassroots level politics-ah mi an la nghet nge nghet lo tih hi zawh tur a ni. VC member pahnih khat bang leh Unit hruaitu pali panga bang hi chuan danglamna a thlen dawn lo.

Dan naranin thing­tlangah chuan VC candidate, Unit hruai­tute hi chu politics-a eizawng leh innghat an ni ṭhin a, heng mite hi chuan an beisei anga an sorkar chhunga sum an hmuh loh chuan inthlan dawna ban mai hi an harsat lova, mipui an bang tel nge tel lo tih hi danglamna siamtu chu a ni zawk dawn a ni.

Zu hmanga paih thlak tawp a harsat chhan chu zu duh mi an tam bakah zu zawrh mai hi a pawi tawh lo law law ti pawl hi mipui nawlpui zingah an tam ve tawh a. Zu nena hmeh bela paihthlak tum chu a la khauh fatin ka ring a, chu bakah Pu Lal Thanhawla nin hrim hrim politics khelh pawh hian vote a hui puk puk dawn lova, thingtlangah vak chhuakin mipuiin NLUP an dawn leh dawn loh zuk chian a, chumi azira titi puia lam ṭang tura thlem an ṭul dawn a, a nih loh pawhin kan party kalphung hrilhfiaha sawm luh tum tur a ni.

Khawchhaka MLA bangin Hmar tlang dungah nghawng a nei lova, mi pakhat zui hum hum tur khawpin mipui hi an â tawh bik si lova hei vang hian Congress hruaitu bang hi chu innghahna tur a tling lo vang.

MLA inthlan nan thla khat vel zet hun a la awm a, grassroots politics lam hi party tinte hian tun aia uar hian luhchilh se. Social media-a insawi len te, hall-a leng lo inkohkhawm avanga lawmte leh boruak siam ringawt hi chu a tawpah boruak bawk hi a keng tel duh viau.

Politics tak tak kan khelh duh chuan mipui vantlang kawm ila, chu chu hmin tum ila, a bak boruak awm hi chuan boruak bak a keng tel lo ṭhin.

MLA ngah sa bawk si, sum ngah bawk si sut hi a khirh dawn a, mipui vantlang rin aiin nghing ve lo an la tam avang hian rin aiin an la khauh zek dawn a ni.

- Zothanmawia