Nungchaten Siamtu an fak
Nungchate chuan anmahni hunbi ṭheuhah Siamtu an fak a. Reilote chhung atan hunbi a lo inher chhuak a, chu hun ropui, mawi leh duhawm takah chuan siamtu kutchhuak ropuizia nungchate chuan an rawn fak ṭhin.
Kan ramah hian hunbi pali - thlasik, fur, ṭhal, favang te chu anmahni hun
ṭheuh zelah a lo thleng a, heng hun pui pali te zaia rawn awi turin nungchate chuan an aw rawl neih chhunin Siamtu thilsiam mawina chu an rawn fak ṭhin. Nungchate chu Siamtu ang maiin an danglam ve lova, mihringte erawh chu kan lo danglamin fakna hla pe chhuak tur pawhin zirtir kan ngai ṭhin.
Nungchate awrawl chu a mawi a, hriatna tura beng nei chuan sawi selna tur an hre lo. An awrawl mawi takte chu a tira siamtu in a pek original dik takte an la ni a. An chaw zawn nan ṭangkai lo mah sela, thilsiam mawina te an hmuhin an ngawihbopui thei bik lo a ni. Favang hun nuam tak chu kan hma lawkah a awm tawh a. Losul therengte chuan feh hawngte chu kawng lakah zaiin an lo awi a, hlim takin In an thleng ṭhin.
Mizoramah rimawi a awm hma pawhin kan pi pute zaia lo awi tleitu an ni. An nin ram lamah fakna an pe chhuak a, keinin in lamah fakna kan hlan thung a ni. Dawlrem te, nipui therengte bakah uleuh leh ngirtling hram ngatte phei hi chu a ri a mawi bik a. Rual u te lo awi tleitu an ni a, lunglenna inthup tlat, rilrua riak rengte chu a rawn kai harh a, kum tam liam hnua kan sulhnute kan va hre chhuak a, kan lung a leng vawng vawng ṭhin.
Khuanu in a thil siamte fakna tura nungchate aw mawi tak mai a lo pekte chu mihringte siam chawp rimawi hian a tluk thei ngai lova, an thawm ri mawi takte chu kan bengin alo hriatin, rilru a tiharhin, nun a tihlim ṭhin - chu chu taksa tan hriselna a ni.
Nungcha ṭhenkhatte chu an tet em em avangin an aw ki sang lutuk leh te lutukte chu mihring bengin a zuk hriatpui phak lo a ni. Mahse anmahni chenna khawvel zimteah chuan Siamtu an fakna thawmte chu thil ri ring ber ang maiin hla tak atang pawhin an inhre tawn thei a ni. Rannungte pawh hi tihhlum mai mai loh tur a lo ni. Keini aiin siamtu an fak thiam zawk a, a hunbi tak zelah an rawn fak a, an aw rawl a chuai ve ngai lo, engkim siamtu chuan duat taka a lo enkawlte an ni si a.
Hei hi ngaihtuah teh ramhnuaiah chuan i hlam khat bial lekah khan Lalpa'n a duh taka a siam rannung sang tam takte chhun zan zawmin an khawsa a. Chulai chu an tan khawvel zau pui a ni a, siamtu thil siam hausakna ren rual loh chu kumkhuain tah chuan an chen a. Engkim siamtu chuan khawvel tifamkim tur leh timawitu atan anmahni an hrang ṭheuh angin mak leh danglam taka siam ṭheuh an ni.
Keinin kan duh dana kan tihlum leh ringawt ṭhin hi siamtu duh dan a ni lova, an khawngaih thlakin duat an ṭul a ni. Hawh u, nungchate hi i duat lehzual ang u.
He leilungah hian anni te nen awm ho tura Lalpa buatsaih kan ni si a.
- H.Neihchungnunga, Durtlang North