Supplementary Demand THLAÂ THIL DUM AWM KHI, BÛNGPUI NI LOVIN, KAWR THÛK TAK A NI ZAWK ?

Kan naupan laia kan zirlaibu pakhatah chuan, Thla (Moon)- a thil dum awm khi Bûngpui a ni an ti a, mah se a dik lo. Kawr thuk tak a ni zawk, tiin sawifiah a ni. He thu-ah hian, kei vansang lam chanchin sawi tur haihchham tak leh Biak In chhîp zum pawh la pel lo hian sawi belh tur erawh ka nei hauh lo.

Supplementary demand hi budget siam­remna or síksawina (re-appropriation) ti anga sawifiah theih a ni awm e.

Kan Chief Minister, Finance deptt changtu hian kumin chhung hian kan budget aṭanga kan hmuh tura beisei aṭangin cheng vaibelchhe sang hnih za thum (2300+) chuang kan hmu kim lo tiin, sum kan indaih loh chhan tlipna a sawi a ni awm e.

Assembly budget session kal meka kan annual plan (pass tak) hi cheng vaibelchhe singkhat leh sangli chuang hret a ni. Chuta ṭanga chhut a, a zatve aia tam (6025.44 Crores) chu State Assembly hriatpui loh (a hnu a pass leh ngai) chunga hman zawh a nih hmel hle. Hei hi budget liam mek aṭanga chhut chuan 54.04 % a tling hial.

Hemi chungchang hi Opposition group leader pakhat Pu Lalduhoma chuan voice vote leh ban phar satliah ngawta pass liam chi a ni lo tih ngaihdan neiin sawiho (discussion neih) a rawt a, mahse kum 50 chhung supplementary demand an la sawiho ngai loh thu House Leader thu­sawi dungthulin, State Legislative Assem­bly Speaker Pu Lalrin­liana Sailo chuan, Conventional (tihdan phung) leh practice hi dan (anga ngaih) a ni tiin voice vote hmangin a pass pui ta thung.

Hetianga supple­mentary demand/expen­diture a tam emaw sawrkar leibà a tam changa sawrkar insawi­fiahna ṭawngkam tlangpui chu, bat tam chu changkanna tih leh supplimentary demand a tam chuan hma kan sawn tihna a ni, tih te a ni ṭhin.

He ṭawngkam (hnu­hnung zawk) hi spea­ker pawn a rawn chang­chawi ve chiah bawk.

Kan Annual budget (hlui) zatve aia tam supplimentary budget kan nei a, chutih mek lai chuan, kan annual plan aṭangin cheng vaibelchhe 2300 + kan hmu kim lo an la ti lehnghal hi chu, hrethiam lo kan ṭhahnem viau awm asin.

Supplimentary demand/ expenditures te hi (budget pawn lam aṭanga sum hmuh tiin an sawi bawk si!). Budget hmuh kim loh khi zozai nei chunga supplementary (6025. 44 Crores) awm hi lawmawm lamah lo ngai pawh ni ila, engatinge central sawrkar tehreng pawh hian annual plan mila sum hi min pek ve mai loh le?

Budget piahlama sum hei zozai haichhuak thei hi sawrkar chak awmdan ni ta se, mahni budget siam (estimated) aṭanga 2300+ crores zet hmu kim thei lo hi eng sawrkar nge ni ve ta ang le?

Ti chuan, 'Thla-a thil dum awm khi Bungpui a ni lo ang bawkin, Kawr thûk tak pawh a ni chuang lo' tiin sawi ta ila, dik tak ang mawle?

- Vanlalhuma Kawlni