Nuai 3 chu khawi aṭangin maw?

MNF-in an tlin chuan Mizo mipuite hnenah cheng nuai 3 ṭheuh pek min han tum hem mai a, chu nuai 3 chu SEDP tih hming aṭanga pek min tum a ni. A theih loh tih sawi chiang ngam hmasa pawl ka niin ka ring a, a chhan chu Mizoram mipui hnena nuai 3 pek ṭheuh hi thawh chhuah nei lo state tan a theih loh a ni.

Tun thlengin khawi aṭanga pek tur nge an la sawi thei lova, Congress-in NLUP an sem pawh hi cheng nuai 1 pawh a ni tak tak lova, sing tlem te tein an pe a, sorkar department hrang hrang budget an la khawm a, kum nga chhungin nuai 1 an pe tling hleithei lova, MNF in nuai 3 sem an tum hi chu vote hmuh tumna a ni ngei mai.

MNF MLA khan an kawmnaah khan khawia mi nge pawisa an sem dawn? tih zawhna kha, “Tualvungi ko thiam kan hria,” tiin a chhang a, hetianga thu chiang lo taka chhan hi tun hmaa mipui beiseina siam tum a, “Tuirial kama changel zozaite hi aw...” han tiha sawi zui tur awm mang si lo leh electric eng diltute hnena, “In thinlung a eng alawm,” tih level kha a ni a, fact sawi chhuak thei lo leh sawi ngam lo hi ṭhangtharte chuan an dah tawh dawn si lo.

Tin, Central sor­kar dawr thiam tih hi a awm hranpa lova, dawr thiam lo chu an awm thei tho vang chu. Central sorkara pawisa la chhuak thiam tihte hi chu a scheme-a zir mai mai a ni a, zir thiamna bik pawh nei hran lova central aṭanga pawisa hmu thei viaute phei chu an rinhlelhawm a, midang aia zir sang bik leh fing bik ni si lova pawisa hmu thei bik hi chuan mi tih duh loh tih duh bik a nei tihna a ni mai; mi thiam loh thiam bik tur chuan zir san bik leh mi thiam bik nih a ngai.

Khawvel sorkar kalphunga sum che vel tidanglama hmasawnna thlen tir thiam chu economist ropui leh mi thiam, background nei ṭha, financial education lama hnuhma nei ṭhate an nih laia ‘central dawr thiam’ tih kan la sawi chuan a ruh langa sawi chuan, ‘Miin an dawr dan pangngai piah lama dik lo taka central dawr hreh lem lo. Thamna pawh pe hreh lo.

A ṭul apiang sum hmanga tilungawi hreh lo,’ ti ang velin a hrilhfiah theih a, hetiang aṭanga sum siam hi a tlo lova, ramin a la tuar nge nge dawn a ni.

Cheng nuai 3 sem an tumna hi chiang takin sawi se, “Central-ah BJP an sorkar,” tih vanga insawi thlamuan chawp ringawt hi chu a hun tawh lo vang.

- Lalrammuana