MNF leh BJP inkar hi
Tripura BJP hovin an Chief Minister hovin Mizorama BJP an chak theihna turin an campaign a, chumi pah chuan an hruaitu pakhat chuan Mizoramah BJP leh MNF an thawh dun thu leh inthlan hmaa puanzar a hlauhawm thu a sawi chhuah tlat mai. Mizo upain ‘Pan lovah tho a fu lo’ an tih ṭhin hi politics-ah chuan a dik chiah lova, dawta inpuh a awm ṭhin avangin MNF-te hian hei hi an sawifiah a ngai a, miin Hindu sakhaw zuitute nena thawk dunah kan hnam party hi an puh chuan a pawi thui dawn a ni.
Kum 2017-ah daih tawh khan MNF President Pu Zoramthanga chuan, “AMC-ah kan mal din a, kan chak ta tlat a, chuvangin, MNF High Command-in a lo rel thlûk tawh angin, MNF chuan tumah a thawhpui dawn lo a, a malin a ding dawn,” a ti daih tawh a, MNF hian party dang thawh pui lova mal din hi a tum thu an sawina a rei tawh a ni.
Mipuite rawn barakhaih thuttu chu Tripura BJP hotupa thusawi kha a ni a, BJP hian Hindu sakhaw zuitu party an nih loh thu sawi sawm sarih mah se an inzawm tlat a, BJP din chhan hi India rama hmasawna tur a ni lova, India ram hi Hindu sakhaw zuitu rama siam, Hindutva kalpui a ni tih hi ziakin hmun tam takah hmuh theihin a awm a ni.
Hindutva kal pui an tum thu hi chu khawvel hriatah an puang chiang tawh a, Mizorama BJP leh Hindu sakhua lo sawi hran tum phet hi chu a zialo lam deuh chu a ni.
BJP zuitu zawng zawng hi Hindu sakhaw zuitu an ni tih lam ni lovin BJP party din chhan leh a tum chu a India rama Hindu sakhua chawi lar a ni. Mizoramah chuan Vai Pathian ban sawm nei thlalak thehdarh lam kha a ni ve lova, Mizoramah chuan vote zawn phawt a, a ṭul chuan pawisa sen a, a tam thei ang ber MLA neih. Zawi zawia mipui rin tura awm phawt a, tichuan a tawpah chuan Mizorama BJP lalna din. Chutih hunah chuan Hindu sakhua chuan min lo chiah hneh tawh dawn tih hi an hmu tlang vek a ni.
Tripura BJP hruaituin, “Inthlan hma chuan MNF tan BJP thawh pui chi a ni lova, Mizo mipuiin an hrethiam dawn lo. Inthlan zawhah chuan harsatna a awm lo vang,” a tih hi MNF hian an sawi fiah a ngai. Tin, Delhi lam aṭanga BJP hotupa lo zin khan, “Like minded people” an thawh pui tur thu a sawi a, Congress leh ZPM an ni thei si lova tunge ni chuang ang?
- Ramliana Hmar