MLA LEH EX-MLA TE VICE CHAIRMAN SEDP BOARD-A DAH HI DAN KALHMANG LO LEH ECONOMY KHAWIH A NI EM?

Mizoram sawrkar hnuaiah sawrkar­in SEDP Board 14 siamin, MLA ṭanglai mi sawm(10) leh Ex-MLA pali (4) an vaiin 14 chu Vice chairman dinhmun a pe ta a nih kha. Hei hi kil hrang hrang aṭanga thlir hian dan hmaah a tling zo lo niin a lang thei a ni. Chu bakah, kan ram pachhe tak kan nih laia hetiang Board siam hi pumpelh ni zawk se kan ṭhatpuina a tam thei ang. 

Amaherawhchu, hetiang Board siam hi Party chhungril harsatna siam felna hmanrua a ni maithei a, a lo nih erawh chuan  ram leh hnam aia party harsatna dah hmasa nihna a ni thei bawk ang. Dan mit aṭanga a lan theih dan leh economy lam a nghawng dan han thlir i la. 

Sum leh pai senso lamah chuan Board din avanga senso hi a sang viau mai.  SEDP hnuaia Board 14-te hi Minister-in a ho a, Vice Chairman-in office a kalpui thung a ni. Anni hian personal staff 4 ṭheuh an nei thei a ni. Chhut thuak dan Assembly question chhanna te, Supplementary demand 2019-20 (page 31)  Planning Board hnuai aṭanga senso chu 222.02 lakhs a lo nih dan te en hian, Mizoram mipui suma Governor-in a din a ni. Office expense-ah hian 119 lakhs dil a pawm a ni. 

SEDP office Vice chairman 14 te room furnish nan hian 10.56 lakhs dil belh a ni a, pawm a ni. Hun lokal tur lam budget  2020-21 budget-ah erawh chuan SEDP board Vice chairman office hmanral tur hi tarlan a la ni lo leh rih a, supplementary Demand 2020-21 ah bawk SEDP Board 14 te senso hi dah leh dil belh a ni leh bawkin a rinawm. 

Mipui suma din Board 14 te hnuaia hlawh nei chite hlawh ringawt hi kum khatah 2,0114,540/- lai a ni a, a tam tham hle. Hetah hian Office cheibawlna, dawhkan, AC, phone bill, POL lam chu kawng dang aṭanga hman a la ni bawk. SEDP Board hi awm lovin Minister hian khai mai sela chuan khing sum zozai khi kan hum thei ang. Ṭul loa sum hmanralna dik tak niin a lang. kan ram ei leh bar dinhmun nena han kal dun tir pawh hian senso ṭul loa sum seng thei hi kan ni lo teh meuh hian a hriat si a, a pawi khawp mai. 

SEDP Board Vice chairman Ex. MLA te hi thla tin 40000/- remunerationa pek an ni a, MLA nilaite erawh chu hei hi pek an ni lo in a lang. Amaherawhchu, thil­dang zawngah chuan SEDP Board Vice chairman dangte nen hian chanvo kan sawi turte hi a inangin an dawng vek - chungte chu sawrkar lehkha No B.12020/1/2019-GAD dated 22nd  November 2019 ah terms of reference zinga tarlan an ni. Chung zinga langsar zualah chuan (i) Personal Asst. LDC pakhat (ii) Vehicle pahnih (pakhat Vice Chairman pual, pakhat Vice chairman office Pool vehicle). (iii)  Vice Chairman an nih anga phone bill 1000/- (iv) Meeting apianga alloances 1000/- (v) office lamah LDC 1(one) (vi) Group D pahnih (2) (vii) SEDP Board Vice chairman zawng zawng hi  Minister of state rank pek vek nia tarlan a ni bawk. 

Vehicle thuhlaah khian Vice Chairman-in pakhat a nei a, a hnuaia tarlan hnathawk lian ber chu LDC a ni ta mai a, chumi hman tur chu ni awm tak Pool vehicle pakhat an la nei ṭheuh a ni. Vide Government notification no F.15017/3/2017-GAD dated 21 February 2020 ah Revised entitlement of vehicles-2020 for Government of mizoram employees for various department, Boards, Commi­ssions etc” tiha tarlan a ni. Hengte hi ṭul lo tak ni zual pawhin a lang thei hial mai. 

(i) Terms of reference point no 11 naa sawi danin  Minister of State rank pek vek an ni. Minister of state rank leh status pek vek an nihna ṭawngkam hi an fimkhur em em a, Constitution article 164(1)(a) naa minister awm zat tur 15% aia tam nih loh nan leh chumi laka himna tur ni anga ngaiin  thumal belh an nei ta a, chu chu 'for protocol purposes' tih an telh ta a ni. Protocol purposed tih hi thumal inchuh tur chu a ni ang a, ṭhenkhatah chuan a nemnghet chiang zawmah pawhin a pawm theih. 

Minister 26 nei kan lo ni anga a lanna hi, sawi fel tur chuan a har ve mai thei. EX-MLA  te pawh Minister of state rank pek an nih chuan a bituk kan pel nasa viau a nih hmel. 

(ii) Board hi Governor-in a din/siam a ni (No 12020/1/2019-GAD dt. 21st May 2019) Vice chairman office hi sawrkarin a din a ni. A appointment pawh hi thuneitu tling (competant authority) in a pek a ni (No 12020/1/2019-GAD dt  2nd July 2019). Terms of reference-ah hian tihtawp leh kal zel thu-ah sawrkar thu a nih bawk avangin hetah hian MLA te hi an ṭhut a remchang lo angin alang. 

Helai hmunah hian kan sawi vek seng lovang, 'office of profit' tihah hian Jaya Bachand case-a kan hmuh tawhah chuan, eng thil mah, chu Office nihna a chelh avanga facilities engmah dawng hauh lo ni mah se, dawn theihna post a chelh avang chauha an paih (disqualified) a nih kan hmu thei ang. Chu case rorelte en chuan paih ve theih a nih dan a awm thei a ni. Tin, mi dang case-te han en kual lehin case dang danga Supreme Court ngaihdan nia lang pakhat chu, post an chelh avanga an thil dawn chu eng ang hming (nomenclature) pawh vuah mah se, chumi an chelh avanga hlawkna (an pocket senso bak) an hmuh chuan profit anga pawm a neiin a lang a, an nihna chelh chu pawm loh an nei tlat niin a hriat. Hemi zawnah hian kan MLA-te hian MLA an nihna thlengin an dinhmun an chân mai a hlauhawm hlel lo e. 

Tin, MLA-te hian MLA an nih anga an tihtur leh mawhphurhna pawnah full time-in an thawk thiang lova, Executive lam hna an thawk thei hek lo. Chu chu Legislature, Judiciary leh Executive thawh pawlh lohna thurin (doctrine) aṭangin an thawh loh tur an thawk a ni. Chumi vengthawng chuan “The Mizoram State Legislature Members’ (Removal of Disqualification) (Amendment) Act, 2019” chu 8/4/2019-ah an siam a ni. Chutah chuan Vice chairman hi exempted angin dah mah se, Parliament-in a telh loh chuan a him lo thei tho bawk a, chu chu case dangah hmuh theih a ni ang. 

Heng thila tlawhchhan tur hian terms of reference (3) na ang hian  Board chuan sawrkar inrelbawlna dinglai (established Precedure) angin Department te chu a kaihruai (guide) ang a, a enzui (oversee) in a vil (monitor) ang tih a ni. Chutih rual chiah chuan concern minister a awm loh emaw remchan loh chuan meeting ruahman tawh saah chuan Vice Chairman chu a chair bawk ang. A chunga kan sawi ang hian Department-in SEDP hma a lakna thuah roreltu-ah a ṭhu a ni. Hei hian Executive Power keng tel dinhmun a luah ngei a ni tih pawh a hrilhfiah nghal a ni. 

Terms of reference point dangte pawh hi  a mal mala han lipse chuan, MLA mawhphurhna (Role and functions of MLA) nen han hmehbel dawn a felhlel tak tak a awm thei ngeiin a hriat theihna lai a awm a. Thu tawp erawh chu Governmor emaw Court thu a ni ang.  Chumi examine tur chuan (a) Office a awm tur a ni (b) Chu Office chu Profit theihna hmun a nih a ngai (c) Sawrkarin a siam ( Established) a nih a ngai bawk. Supreme Court in Test 5 a lo siamte pawh en tel a ṭha ang. MLA an nih anga an dawn theih piah lam hlawkna an tel hi a pawisa emaw a kind (bungrua/ thil) an dawn hi a remchan lohna a awm hmel bawk. Test hrang hrangah hian an tlak fai vek kher pawh a ngai lo thei nia a lanna a awm bawk.

Ngaihdan leh thlirdan hrang hrang a awm thei  COURT erawh thlen phawt a ngai ang, chutih rual chuan hetianga chanchinbuah emaw thu ziak mai lo hian “I ngam a nih chuan Governor ah, Chutah Court-ah kal mai la,” pawh min ti thei ang. Chutiang ngeia hmalak tuma ka inbuatsaih lai leh document te ka tih fel viau tawh lai chuan 17th Nov hian Party pakhatin Governor ah lehkha thehluh an tum tih thu ka dawn tak avangin ka chawl ta a,  a thu kalhmang hi mipui hian an hriat zau ve a tha e tiin ka rawn chhuah ta zawk a ni.

Political Party pakhatin an bawhzui tak avang erawh chuan thutlukna siam tur tan Public interest (PIL)  ni chiah lo Political Party interest anga an lo ngaih mai erawh thil awm thei tho ani ang chu.  A enga pawh khi Governor thu a ni a, chumi hnuah a ṭul a nih chuan Court sang ber thu thu a ni mai a. Chak theih chak loh theih a nih avang chuan point mumal tak neih a ngai ang. Sawrkar erawh chuan inenfelin hetiang board rem leh rem loa din ai chuan ṭhiat mai se kan hnam tan chuan kan hlawkpui zawkin a rinawm tlat a ni.