Cyber Crime thila F I R thehluh hi...

Congress Ṭhalai (MPYCC) chuan November 9, 2020 khan Minister zahawm tak, MZU zirlaiten Best Parlia­mentarian atan meuha an lo thlan tawh Pu Lalruatkima, Minister of State lakah FIR an thehlut a. FIR hi Cyber Crime Police Station, Aizawlah thehluh a ni. 

Pu Lalruatkima, Minister of State hian kum 1986-a MNF leh India sorkar inremna chungchanga document pakhat, Wikipedia-a dik lo taka tuten emaw an lo tihdanglam chu facebook group ṭhenkhatah a thehdarh a. Chu chu 'document dik lo hmanga mipui bum tumna a ni e' tiin Congress ṭhalai hian FIR an thehlut ta a ni ber. 

He document hi tunlai ramri issue nena inzawm thil a ni nghe nghe. 

Kum 1986-a India sorkar leh MNF inremnaah khan Mizoram state chu  North Eastern Areas (Reorganization) Act, 1971 angin siam a ni ang tih a ni a. Hei hi thil pawi tak niin, Mizoram leh Assam ramri chungchanga Mizoram dinhmun tichhetu ber a ni zui ta nghe nghe. 

Mizo mipui nawlpuiin British-ho leh Mizo lal Suakpuilala inremna anga kum 1875-a siam Inner line ramri tun thlenga kan pawm laiin, MNF leh India inremnaa an tarlan, North Eastern Areas (Reorga­nization) Act, 1971 hi chuan kum 1933-a Mizote rawn lo a ramri an lo siam, Vairengte khaw chhunga kaltlang hi a pawm ta tlat si a ni. 

Kum 1986-a India sorkar leh MNF inremna anga ramri atana kan pawm tak, tuna Vairengte khaw chhunga kaltlang ramri hi Constitution behchhan a nih tak tlat avangin Assam lam chuan Constitutional Boundary a ni e tiin an ṭang ve ta tlat a. Tun hnaiah pawh Assam Chief Secretary-ten an sawi chhuak ta chat chat mai a nih kha. A nihna takah chuan India sorkar pawhin ramri atana official taka a pawm chu he ramri, Vairengte khaw chhunga kaltlang hi a ni. 

Tun hnuah duh lo sa teh mah ila, 1986 inremna hmanga kan pawm tawh a nih miau avangin tih theih kan nei tlem hle. 'MNF leh India sorkar inremna siam a nih dawn khan, khatih hunlaia Zirlai Pawl hruaitute leh Congress Party hruaituten, ramri chingfel hmasa lo chuan lo chhuak suh u, an ti lawm lawm chungin Pu Laldenga leh MNF hotute kha thuneihna duh lutuk avangin an lo chhuak lui' an tih fo chhan pawh helai inremna bung leh chang tak hi a ni ta a ni.

Chutiang taka pawimawh inremna, 1986-a MNF leh India sorkarin an ziah, Constitution-a an bilh tel thlap tawh "Mizoram state chu North Eastern

Areas (Reorganization) Act, 1971 angin siam a ni ang," tih chu tuten emaw internet lamah lo ti danglamin, "Mizoram state chu Inner line 1875 anga siam a ni ang" tiin Wikipedia-ah an lo thlak daih mai a. Chu an tihdanglam thlalak, dik lo tak chu hre si lovin emaw, hre ru reng chungin emaw MNF sorkara Minister of State zahawm tak, Pu Lalruatkima hian social media-ah a thehdarh ta a, thil pawi a thleng ta a ni ber mai. 

Minister Pu Lalruatkima hi MLA leh Minister atana lakluh a nihin India Con­stitution hnuaia rin­awm­na thu tiam thlap a nih avangin Constitution a inziak document, dik lo taka tihdanglam a post darh ta vak mai hi a pawi thei viau dawn niin a lang a, a dinhmun a duhawm loh hle.

"Tihdanglam a ni tih ka lo hre lo a ni" ti dawn se, kum tam tak MNF a lo awm tawh, MLA term 2 tling tawh leh MNF sorkara Minister of State ni pha meuh chuan MNF leh India sorkar inrem dan te, ramri chungchanga inremna lo awm tawh dante chu hre ngei ngei tura ngaih a ni si a. A hre miah lo a nih chuan Politician lak tlak loh tak, MZP leh Central YMA hruaitu lawk ni tawh chunga ramri chungchang hre chiang miah lo a ni dawn tihna a ni. 

Leh lamah hre reng chunga document dik lo thehdarh lui a nih a inpawm vaih chuan thiam loh changin jail hial a tan phah thei bawk si. 

FIR dawngtu Cyber Crime Police lamin an enfiah ang a, case siamna tlaka an ngai a nih chuan Pu Lalruatkima, Minister hi case an siamsak dawn chauh a nih hmel. 

Case an siamsak lo a nih erawh chuan Police kut phuara inpuhna Politics, inbeihna ngaihnawm takin a chhunzawm ngei ang! Tin, he thil hi Constitution khawih thil a nih bawk si avangin thubuai thehluttute hi court sang zawkah, MNF sorkar thunun phak lohnaah an zualko zui ngeiin a rinawm bawk. 

Pu Lalruatkima, Minis­ter-in document dik lo a thehdarhna screenshot (thlalak) te mipui vantlang hmuh theiha tarlan a nih vek tawh bawk si avangin Police lam pawh dinhmun lai takah an ding ngei dawn niin a lang e. I lo thlir zel teh ang.