Tholeh lo turin kan tlu hlen thei

Mizoram mipui te hi kan hnam ah leh kan sakhuanaah hian i chiang tlang ang u. Kan hma lawka MLA inthlan lo awm turah hian, ngaihtuahna fim tak leh chhia leh ṭha hriatna thiang tak hmangin leh dam thlapa ngaihtuah chungin Party Party pawh ti lovin duhthlanna siamin vote i thlak ang u.

Evi leh Adama te khan duh an thlan sual pawi thuizia kha kan hre chiang tawh a, chuvang chuan milem bia leh an thurual puite chu vote duh hle mah ila chhia leh ṭha hriatna hmangin hreh tak chung pawhin kan vote loh ngam a ṭul ta, hei hi thil dang zawng zawng aiin a pawimawh zawk.

Mizo te hian natna chi hnih kan nei a, natna satliah leh thihpui ngei ngei tur chi natna. A pahnihna hi Kohhran te pawh hian an ngaih pawimawh a ngai a ni. Thihpui ngei ngei tur chi hi, an rahbi hmasa chu kan hrethiam lo a ni maithei a, rahbi pahnihna hi kum 2021 alo thlen meuh chuan Kohhrante hi mittui nena

ṭawngṭai rual a la ngai fo ang a, inchhir a sawt tawh lo ang. 2018 inthlan hi kohkir leh chakin kan kun reng ang a, kan tawlhthluk tawh chuan sum leh pai leh fin kherekin min umzui ang a, kan thawh leh theih a rinawm tawh lo.

Kristianna leh kristian ram hi a bo ṭep ang a, chumi thlen hma chuan kohhran lam pawh hian kan ngaihtuah chian hle a ngai. In mawhpuhin awmzia a nei tawh lovang, thil dang zu aiin hei hi a pawimawh ber zawk.

Tun hma MLA kan inthlan te kha chuan Congreess an ṭha an ṭha lo, MNF an ṭha an ṭha lo, ZNP, PC an ṭha an ṭha lo tiin thlamuang takin kan sawi ṭhin a, chung zawng zawng chu kum nga term chauh a ni ṭhin. Tun ṭum kan inthlang tur hi chu kum nga ni lovin Kum khaw term ni thei turin a lang ta tlat mai.

Thil hi sawi liam puat puat tur a ni lo, tunah hian eng ang pawhin han sawi mam tum ṭhin mahse Mathaia 7:16 ah chuan ‘an rahah in hre mai ang’ a tih kha. Tun ṭum vote thlak tur hi chu Mizoram chauh ni loin N/E leh India ram pumpui thlir chungin vote kan thlak a ṭul ta. Tute nge an kuahbeh tlat a, tute nge an zakzeh beh tlat? Tute nge thlah phal lova an humbeh tlat a, an support tlat tih hi kan hre ṭheuh ang a. September 2018 Kristian tlangau page 14-15 ah khan Kristian tih duhdah a lan leh tawh kha.

NEDA-ah hian BJP leh MNF te hi thawk dun - rahbi pakhat rap dun an ni. CADC inthlan result chhuah hlim khan Pu Zoramthanga’n chiang taka a sawi kha, Kristianna leh Kristian ram hi a dinhmun zel tur chu Mizote kutah hian a awm a, nasa taka ṭawngṭai chungin fim takin i kal chho ang u. II Chro 19:2 ah misualte chu i ṭanpuiin Lalpa hawtute chu i hmangaih dawn a ni maw, hemi avang hian Lalpa thinurna i chungah a lo awm ta a ni, Lalpa’n a tihte zingah hian tel ve loh hram i tum ang u.

Ka hming pu, ka mite chuan inngaitlawma an ṭawngṭai a, min zawna an awm dan sual te an hawisan chuan Van aṭangin ka lo ngaithla ang a, an sualte ka ngaidam anga an ram chu ka tidam leh ang.

Pathian lama kan ṭan tlat chuan ani pawh kan lamah a ṭang dawn a ni.

- Lalchawiliana, Chhinga veng