Kamrula lo pawhin an hmu ve tho
Kan Chief Minister zahawm tak Pu Zoramthangan press mite zawhna a chhanna, 'Kamrul-a pawhin hna a hmu a, Kamrul-a lo pawhin hna an hmu ve tho a, ' tih lam hawi kha a ni a. Ka thinlung chhung hi na takin a rawn deng dawp dawp a, hei hi kan sorkar hruaitute insawi fiah theih dan a nih chuan, "Budget chu kan duh leh kan kang ang a, kan duh leh kan bai ang," tih ang tho kha a la niin kan politician ṭhenkhat hi chuan Mizo ṭhalaite hi min ngai mawl lua deuh lo maw? ka ti ṭhin.
"Kamrul-a kan duhsak bik lova, kan duhsak lo bik lo bawk," a tih khan Kamrul Laskar, hna hmu thei fal tak mai hi an duhsak lo tih pawh sawi chhuah ngam a ni ta lo.
An duhsak bik loh a sawi ruala duhsak loh bik loh a sawi zui hi a hnu lawka Kamrul-a hnathawh zat lo chhuak nen hian kan en ta chet chet ila, "Aw tuna kan ram dinhmun hi dawn ve la lung a awi nem maw" tih loh chi a ni ta love.
Kamrul-a hian kum 2018-19 hnuah sorkarah hian cheng nuai hlir 8,815.37 a hmu tawh a, nuai hlira sang riat tamzia chu a taka kan la hmuh loh vang hian a sawi pawh kan la sawi ri thiam lo zawk a ni. Hetah hian 10% lek pawh lo hlep ta se cheng nuai 881 chuang chu Kamrula hian a hlep dawn tihna a ni a, hei hi chu 10% leka chhut sak mai mai a ni a. Hna ṭhenkhatah hi chuan 50% dawn dawn hlep theih dan a awm an ti a, a ṭhenah chuan 30% bawr vel te pawh a ni ang, eng pawh ni se 10% hi chu an hlep ngei ngei anga ngaih a ni ta phawt.
Tin, Zoramchhana, Electric Veng hi Kamrula ni lo hna hmu ve tho chu a ni a, ani hian cheng nuai hlir 7,476.02 a hmu hem tawh bawk.
Ani hi chu Chief Minister te laina hnai em em mai a ni a, an chhungte Chief Minister leh Finance Minister nih zar a zo tiin a hriatthiam theih dan dan a awm mahna. Congress lai pawh khan CM chhungte khan hna an hmuh theih viau kha.
Nimahsela Kamrul-a hi hna thawk thiam uchuak leh midang aia thawk thiam bik, Engineer leh Architect pawh nei ṭha fal leh thawk ṭha bik a nih lem si loh chuan, eng vangin nge hna a hmuh theih em em ni? Hnam Runa a kula tai leh vangvat kai tam takte aia Kamrul-a hna hmuh theih dan em em hi, tihte hi rilru-ah a lo lang lo thei lo a ni.
Kamrul-a an duhsak bik loh laia an duhsak loh bik loh thu sawi nghal zat a ngaih chhan hi hna a hmuh hnem vang hi a ni thei mai ang em? He zawhna hi Mizo ṭhalaiten a chhanna i ngaihtuah tlang teh ang u.
- Lalremruata