Bial nghet nei lo politician langsar
Vairam kan tih mai India ram state dangahte hian politician kumhlun leh langsar chin hi chu bial nghet nei an ni deuh vek a, an Party an tlak chhiat ber lai pawhin heng political leader langsar hi chu an tling thei deuh zel a, he mi kawngah na na na hi chuan Congress President Pu Lalthanhawla hi a ngaihsanawm khawp mai.
Pu Hawla hian Serchhip bial tán hna a thawk ṭha tawk a ni ngei nia rin theihna chu he a bial ngaiah hian a tling nawn thei reng mai a, amah hi Mizoram a enkawl danahte leh kawng dangah hian duh khawp lo ṭhin mah ila a bialah hian a la tlatlum tlat mai a. Tunah pawh a tling leh ngei dawn niin a lang a, a political record hi ṭhangtharten an la en chiang anga Indian politician ropui zingah an la chhiar tel dawn chiang a ni.
MNF lama Pu Hawla han el phak deuh tur chu Dr R Lalthangliana kha a ni a, Dr Thangtea kha ṭum li kha a zawnin a bial ngaiah khan a tling thei kha a ni a, a bialah khan a che ṭha thawkhat a ni ang. Mahse Dr Thangtea pawh a bial aṭangin a tla a, fight back tum ngam lovin MNF ṭhatna nia a rin a bawh ta chat mai hi tun hmaa kan hmelhriat ang kha chu a ni ta lova, ngam loh neia tlanchhia a ni ta a ni.
MNF President ber Pu Zoramthanga hi Champhai aṭanga tlingin Chief Minister a ni a, CM bial meuh chu hmasawnna pawh a tam a, nimahsela he lamah hian 2003 khan bial pahnihah a tla ve ve tlat a ni. Kum 2008 a lo her chhuak a, Chief Minister hlui leh Party lian President chuan a bial ngaia din leh ngam awm a nih tehlul nen a tlanchhia a, an khaw chhuahna lam East Tuipui a pan ta vang vang a, mualpho takin a tla leh tho a. Kumin inthlanah hian an khaw East Tuipui lama a din nawn leh ngei a rinawm laiin a tlanchhe leh a, Aizawl East I lamah a ding leh dâwn ta a ni.
Vairam politician hlun hnathawk ṭha na na na chu vawi khat han tlak palh a awm pawhin a ngaiah an ding nawn ngam a, history a hming chuang tur khawpin bial ngaiah an bei ngar ngar mai ṭhin a, hemi kawngah hian Pu Hawla hi a ngaihsanawm khawp mai.
Pu Zoramthanga hi tlanchhe kuala tlin theihna a zawng duk duk mai hi hna a thawh ṭhat loh vanga bial nghet nei lo, tlin theihna tur a nih chuan khaw chhak leh Aizawl pawh pan tawn sek mai angin ṭhangtharte chuan an ngai dawn ta a ni.
Tun ṭum inthlanah hian a tlak leh phei chuan party lian ang mipuiin kan ngaih President lai ni mahse bial nghet a nei thei lovin a insawn leh dawn a nih hmel hle a ni.
- Lalthanpuia, Dinthar