Mizoram GSDP leh per capita income chungchang

Mizoram GSDP leh Per Capita Income ṭhan dan chungchangah tunhnaiah mi hrang hrangin sawi dan inang lo tak takin platform hrang hrangah an sawi ṭhin. GSDP leh Per Capita Income hi ram hmasawn dan tehna bulpui ber a nih avangin Mizoram mipuiten a kalhmang mumal deuh taka kan hriat a ṭhain a rinawm. Thu inchuhte pawh awm thei nia a lan avangin kan lo thawh ve ṭhinna aṭanga kan tawnhriatte han tarlan ve hi a ṭhain ka hria.

Ram hmasawnna ṭhan dan teh nana khawvel ram hrang hrangin an pawm tlan chu ram chhunga sum leh pai thawhchhuah, Gross Domestic Product (GDP) leh mimal tin chawhruala thawhchuah zat (Per Capita Income) te an ni. State bik sum leh pai thawhchhuah sawina atan chuan Gross State Domestic Product (GSDP) tih a ni thung.

GSDP chhut chhuak tur hian System of National Accounts (SNA)-in guidelines a siam angin approved methodology bik a awm a, mimal leh pawl leh institution-ten an lo chhut (estimate) emaw, lo rinlawk (projection) ve hi sawrkarin a pawm lova, rintlaka ngaih pawh a ni lo.

GSDP hi Production, Expenditure leh Income Approach kaikawpa chhut ṭhin a ni. Data mumal taka kan neihna Sector-ah chuan line department emaw agency aṭangin data lakkhawm ṭhin a ni a. Data gap awmna apiangah chuan survey chi hrang hrang, Ministry of Statistics & Prog­ramme Implementation (MoSPI) kaihhruaina hnuaiah kalpui ṭhin a ni.

GDP/ GSDP hi Central Statistics Office (CSO), Mi­nistry of Statistics & Prog­ramme Implementation (MoSPI)-in a chhut dan tur kalphung a duan ang thlapin India rama state zawng zawngin methodology ang­khat hmangin an chhut ṭhin. Heng data set hi ennawn a, khaikhin turin leh a inmil lo laite zirchiang turin kum tin May - June thla velah State Official leh Ministry Official te’n reconciliation meeting an nei ṭhin a. GSDP hi Financial year anga estimate ṭhin a ni.

GSDP chhutchhuah nan heng sector-ah te hian ṭhen hran a ni - Agriculture (Crop Husbandry), Livestock, Fo­restry& Logging, Fishing & Aquaculture, Mining & Quarrying, Manufacturing, Construction, Electricity, Gas& Water Supply, Tran­sport, Trade, Hotels, Finan­cial Services, Real Estates, Other Services, Public Adminis­tration etc. Heng sector aṭanga kum khat chhunga an thawhchhuah zawng zawngte chu a pawisa hlutna-a chhut chhuah ṭhin niin hemi hlutna belhkhawm chu GSDP tih a lo ni ta ṭhin a ni. State boundary chhunga economic activity zawng zawng hmaih nei lovin state tinah methodology inang khat vekin an hlutna chhut ṭhin a ni. State sawrkarin a duh anga lo siam danglam (manipulate) mai theih anga sawi awm ṭhinte hi thil ni thei lo tawp a ni.

Mi ṭhenkhatin GSDP chhut nana central sawrkar-in state-a sum a pek ṭhin viz, Plan Fund, Non Plan, CSS, Finance Commission Award, etc.-te an nih anganga GSDP chhutna-a thun luh anga an ngai hi a dik lova. Budget documents aṭangin kan expenditure-te mumal taka lakchhuah a ni a. Actual Expenditure chauh finalized GSDP-ah a sector milin thunluh ṭhin a ni. Hei pawh hi Production, Expenditure leh Income Approach data-te nena enho leh vek a ni.

Kan sawi tawh ang khan GSDP hi ram hmasawn dan tehfung pawimawh ber anga ngaih a nih avangin kum tina GSDP ṭhanna (percentage growth rate) hi ram leh state hmasawnna tehfung pawimawh ber a ni. Mi ṭhen­khatin Mizoram GSDP chu a ṭhanna (percentage growth rate) sang mah sela a len zawng (size/ amount) India ram chhungah a hniam ber zingah a awm tiin an sawi ṭhin a. Hei vang hian mimal tinin kan thawh chhuah chawhrual (per capita income) en tel a ngai ṭhin a ni.

India ram chhunga state hrang hrangte hi kan intiat lo em em a. Uttar Pradesh-ahte chuan India rama mipui zawng zawng zinga za zelah 16.49% zet an cheng a. Mizoram angah te chuan India mipui za zela 0.09% chauh kan cheng thung a ni. Hei vang hian state-te income (GSDP) hi compare hleih theih a ni lo. Mimal tinte thawhchhuah chawhrual (per capita income) zawk hi state hrang hrangte hmasawn dan khaikhinna tur atana tehfung dik tak zawk chu a ni.

Mipuiina kan hriat tlat tur chu ram hmasawnna kan sawi hian kum tina GSDP ṭhanna (percentage growth rate) leh mimal tinte thawhchhuah chawhrual (per capita income)-te hi kan sawi ber tur chu a ni. Heng data-te hi central sawrkarin state zawng zawng inrualkhaia a chhut sak leh state sawrkarin-a a duh anga a lo tihdanglam ve ringawt theih a ni lo. Tunhnai kum li vel chhunga India ram chhunga state GSDP ṭhang chak ber zinga kan telte hi thil lawmawm tak a ni.

Kum 2012-13 aṭanga kum 2016-17 chhunga India ram pum annual average growth rate chu 6.92 a nih laiin hemi hun chhunga Mizorama kan annual average growth rate chu 12.49 a ni thung. Hei vang hian Mizoram chu India ram state-te zingah ‘growth driver’ tih theih a ni. Mizoramah thawhchhuah mumal kan nei lova, central aṭanga sum kan hmuh ang ang hi kan GSDP a ni ti maite pawh an awm ṭhin.

Mizoram state annual budget pumpui (plan, non-plan leh CSS) hi kum 2016-17 khan Rs 7481.72 crore a ni a, hemi kum veka kan GSDP chu Rs 17613.18 crore zet a ni; a inthlauhna (ram chhunga sawrkar budget pawna thawhchhuah anga ngaih theih) ringawt pawh hi Rs. 10131.46 crore zet a lo ni reng mai. Per Capita Income pawh ram pum chawhrual (India average) aia kum 2013-14 aṭanga a lo sang ta te hi thil lawmawm tawpkhawk a ni. Heng thil ṭha Mizoramin a thawhchhuahte hi inhnial nan leh inchirhtheh nana hmang lovin a nihna ang taka lawm taka pawm a, hmasawn zel tum hi mipui zawng zawngina kan tih tur chu ni awm tak a ni.

- Lalrambeiseia, MPESS (Rtd.)