Sawrkar tharah hnathawh kawr nen
Inthlanpui kan hma lawkah a awm tawh a, political party hrang hrangte chuan voter a tam thei ang ber an hmuh theih nan an policy an tlangzarh a. Ringtute tan chuan insawiselna leh infakna lam aiin an policy tlangzarhte ngaihthlak a nuam zawk ṭhin. An thil tih tumte ti hlawhtling tur chuan ram hruaitu chu mi taima, a thil tum hlen chhuah tuma rinawm taka thawktu a nih a ngai.
A pawimawh ber chu ‘taimakna’ hi a ni. Taimakna chuan intodelhah min thlen ṭhin. Nakkum 2019 khi sorkar tharah hnathawh taimak kumah puang ila, Mizoram chhunga awmte chuan mahni phak tawkah, mahni hma zawn ṭheuhah kan tih tur pual awmte chu hun vawng dik chungin rinawm takin taima takin hlenchhuah i tum zel ang u.
Kum tir aṭangin hnathawh kawr lei ṭheuh ila, hnathawh kawr la inbel ngai lo tan thil thar a ni dawn. Hnathawhna hmanrua lei bawk ila, kan ramah hian Zoram thar hmel a lo lan theihna atan intodelh turin taimak i chhuah thar ang u. Kan Aizawl bazar puiah chuan hnathawhna thawmhnaw leh hmanruate leitu an tlem hle laiin incheina thawmhnaw leitu an ṭhahnem em em thung a. Hei hian kan buaipui leh kan dinhmun a hrilhfiah.
Kan pi leh pute kha an taimain hnathawh kha an hun hman tamna ber a ni. Mi thawhchhuah sa an ring ve lo. Japan ram te, Israel ramte chuan an thlahtute taimakna kha an la chhawm nung zel a, an ram chhengchhe tak pawh hnianghnar takin an cheibawl a ni. An taimakna avangin khawvela ram intodelh ber ber te an lo ni ta a ni.
Mizote hi ral leh sahrang hmaa zam ngai lo kan ni a. Engvangin nge kut hnathawh hi kan hrehin kan zahpui ang le? Hnathawh peih lo leh hnathawh en hniama zahpuitu chu mi dawizep leh mi zahpuiawm tak an ni zawk. Ram changkang leh intodelhah chuan an kawng kalte hi an chak a, an hmaa awm tih turte tih thuai thuai tumin chak takin an kal ṭhin.
Kan khawpuiah te hian tih tur nei lem lo inchei nalh tak takte kal pelh aiin hnathawh thawmhnaw hain in kal pel zung zung mai ila, ava hlu zawk dawn em! Mahni thawh chhuah ni lo eitu chu Eden huan mawi tak aṭangin thehchhuah an ni a, bianga thlantui luang khawpa mahni thawh chhuah ring tura tih kan ni ta zawk a.
Mahni thawh chhuah ringtu chu mi ‘intodelh’ an ni a, mahni thawh chhuah ni loa inti hausate chu Bible-in ‘mihausa’ a tih a huat deuhte chu an ni. Mi taima thinlung chu a thianghlim a, a chapo lova, mi a sawisel hman ve lo.
Mi taima intodelh te hi i chawimawi ang u. Sorkar tharah kan ram hruaitu turten hnathawh kawr hain, hmahruaiin bul rawn ṭan teh se.
- H.Neihchungnunga, Durtlang North